Bakı Musiqi Akademiyasında Üzeyir Hacıbəylinin 140 illiyinə həsr olunmuş konsert keçirildi
Heydər Əliyev Fondunun və Azərbaycan Respublikası Mədəniyyət Nazirliyinin təşkilatçılığı ilə keçirilən XVII Beynəlxalq Musiqi Festivalı çərçivəsində növbəti tədbir sentyabrın 26-da olub.
Crossmedia.az xəbər verir ki, Üzeyir Hacıbəyli adına Bakı Musiqi Akademiyasının Böyük zalında təşkil olunan “Üzeyir bəyin ocağında” adlı konsert dahi bəstəkar, Azərbaycan professional musiqi məktəbinin banisi Üzeyir Hacıbəylinin 140 illik yubileyinə həsr edilib.
Konsertdə Akademiyanın istedadlı tələbələri çıxış edərək Üzeyir Hacıbəylinin əsərlərini böyük məhəbbətlə ifa ediblər. Proqramda bəstəkarın “Arazbarı”, “Aşıqsayağı”, “Sənsiz” və “Sevgili canan” romansları, “Arşın mal alan” musiqili komediyasından Gülçöhrənin ariyası, İki saylı Fantaziyası, həmçinin Emil Əfrasiyabın “Parafraz” əsəri səsləndirilib.
Səhnədə Hüseynağa Aslanov (qiraət), Zərif Kərimova (qiraət), Əli Adıgözəlov (piano), Əsmər Alxazova (piano), Elçin Məmmədov (piano), Aysun Mahmudzadə (vokal), Hidayət Sadıqbəyli (piano), İluzər İbrahimzadə (piano), İsmayıl Əsədbəyli (vokal), Özcan Cabbari (violin), Nəzrin Qulamova (piano), Ülviyyə Mustafazadə (violonçel), Zəminə Kərimova (piano) uğurlu çıxışları ilə tamaşaçıların rəğbətini qazanıblar.
Konsertin xüsusi qonaqları sırasında Beynəlxalq Muğam Mərkəzinin nəzdində C.Cahangirov adına xor da olub. Xorun bədii rəhbəri – Azərbaycan Respublikasının Əməkdar artisti Təranə Yusifova kollektivlə birgə parlaq ifası ilə tədbirə xüsusi rəng qatıb.
Bakı Musiqi Akademiyasının Böyük zalında keçirilən bu konsert, festival iştirakçıları və musiqisevərlər üçün həm unudulmaz musiqi bayramına, həm də Üzeyir Hacıbəylinin zəngin irsinin təntənəsinə çevrilib.
11:03 27.09.2025
Oxunuş sayı: 6558
