İlham Əliyev BMT-də çıxış edərək strateji əhəmiyyətli məsələlərə beynəlxalq ictimaiyyətin diqqətini cəlb etdi - Deputat
Azərbaycan Respublikasının
Prezidenti İlham Əliyev BMT tribunasından çıxışında bildirib ki, artıq azad
edilmiş torpaqlarda 50 mindən çox insan öz doğma yurduna qayıdaraq yaşayır, işləyir
və təhsil alır. Dövlət başçısının sözlərinə görə, bu fakt işğaldan azad olunmuş
ərazilərdə həyata keçirilən bərpa və quruculuq işlərinin real nəticəsidir və
Böyük Qayıdış proqramının uğurla icra olunduğunu göstərir.
Mövzu ilə bağlı Crossmedia.az-a Milli Məclisin deputatı Elman Nəsirov
açıqlama verib. "Azərbaycan Respublikasının Prezidenti cənab İlham Əliyev
25 sentyabr tarixində BMT Baş Məclisinin 80-ci sessiyasında çıxışı zamanı bir
sıra strateji əhəmiyyətli məsələlərə beynəlxalq ictimaiyyətin diqqətini cəlb
etdi".
Deputat qeyd etdi ki, bu gün işğaldan azad olunmuş torpaqlarda
genişmiqyaslı quruculuq işləri aparılır: "Qarabağın bərpası və yenidən
qurulması prosesi sürətlə həyata keçirilir və artıq 50 mindən çox vətəndaş həmin
ərazilərdə yaşayır, işləyir, təhsil alır. Bununla Qarabağ və Şərqi Zəngəzurun məskunlaşdırılması
prosesi yüksək templə davam edir".
Elman Nəsirov bildirib ki, Ermənistanın 30 illik işğal dövründə həmin ərazilərdə
bütün infrastruktur məhv edilmiş, tarixi və mədəni irsimizə ağır zərbə
vurulmuş, 65 məscid dağıdılmışdır: "Hazırda isə konkret dövlət proqramı əsasında
həm Qarabağın və Şərqi Zəngəzurun bərpası, həm də məskunlaşdırılması həyata
keçirilir. Tarixi qayıdışa dair dövlət proqramı qəbul edilib və 2026-cı ilin
sonuna qədər 140 minədək soydaşımızın öz ata-baba yurduna qayıdışı təmin ediləcək.
Qarabağın bərpası ilə bağlı işlər paralel şəkildə davam etdirilir – ərazilər bərpa
olunur, yeni infrastruktur yaradılır və bununla yanaşı məskunlaşma prosesi
reallaşdırılır. 2021-ci ildən 2024-cü ilin sonuna qədər bu məqsədlə 19 milyard
manat vəsait ayrılmışdır. 2025-ci il dövlət büdcəsindən isə əlavə olaraq 4
milyard manat vəsait nəzərdə tutulub. Ümumilikdə 41,4 milyard manatlıq xərclərin
təxminən 9,6 faizi bu istiqamətə yönəldilib".
Deputat vurğulayıb ki, Azərbaycanın kifayət qədər maliyyə imkanları və
möhkəm siyasi iradəsi var: "Bu, dövlət siyasətidir və xalqımız ata-baba
torpaqlarına böyük qürur hissi ilə qayıdır. Bu gün Qarabağ və Şərqi Zəngəzur
böyük bir tikinti meydançasını xatırladır və bütün bu reallıqlar beynəlxalq
ictimaiyyətin diqqətinə çatdırılıb".
Xumar
Emilqızı
19:09 26.09.2025
Oxunuş sayı: 1326
