Qarabağda genişmiqyaslı bərpa işləri regionun yeni iqtisadi mərhələsinə start verir — Professor
Dünya iqtisadiyyatı və Azərbaycan (Layihənin müəllifi Rüfət Quliyevdir)
Qarabağ bölgəsində aparılan genişmiqyaslı bərpa və quruculuq işləri regionun iqtisadi və sosial inkişafında yeni mərhələnin əsasını qoyub. Azərbaycan dövləti azad edilmiş ərazilərdə bütün əsas infrastruktur — yollar, elektrik, su, rabitə və digər zəruri xidmətləri təmin etməklə bu əraziləri investisiya baxımından cəlbedici məkana çevirir. Xüsusilə Qarabağın zəngin təbiəti, əlverişli iqlimi, kənd təsərrüfatı üçün geniş imkanları, həmçinin turizm və sənaye sahələrində böyük potensialı xarici investorların diqqətini cəlb edir. Prezidentin Qarabağ üzrə xüsusi nümayəndəsi Emin Hüseynovun da qeyd etdiyi kimi, artıq bölgənin hər bir rayonu özünəməxsus iqtisadi imkanlara malikdir və bu, regionu yeni sərmayə yatırımları üçün əlverişli mərkəzə çevirir.
Bu barədə Crossmedia.az-a danışan Milli Məclisin dörd çağırış deputatı (III, IV, V, VI) iqtisad elmləri doktoru, professor Rüfət Quliyev bildirib ki, Azərbaycanın Qarabağda həyata keçirdiyi işlər misilsiz miqyasdadır:
“Öncə qeyd etmək istəyirəm ki, bu günə qədər bizim azad olunmuş bölgələrə təkcə dövlət büdcəsindən 22 milyard manatdan çox vəsait ayrılıb. Bu illərdə 2025-ci ilə qədər, 4 milyard manatdan çox vəsaitin xərclənməsi nəzərdə tutulur. Hətta ola bilər ki, bundan da artıq çıxsın. Bu onu göstərir ki, Azərbaycan hakimiyyəti oradakı quruculuq işlərinə, iqtisadiyyatın yenidən bərpasına böyük diqqət ayırır, ciddi maliyyə yönəldir".
Siyasətçi bildirib ki, infrastruktur sahəsində görülən sürətli işlər Qarabağın iqtisadi inkişafı üçün möhkəm baza yaradır: “Cənab Prezident İlham Əliyevin birbaşa tapşırığı ilə infrastruktur qurumları tərəfindən çox böyük və nəhəng işlər qısa zamanda görülüb. Mən xüsusilə Azərişıq, Azərenerji, Azərqaz kimi qurumların fəaliyyətini qeyd etmək istərdim. Məsələn, Azərişıq cəmi 37 gün ərzində həmin bölgələrə işıq sistemi çəkib. İşğaldan azad olunmuş ərazilərdə işıq tamamilə yox idi — yeni stansiyalar tikildi, kabellər çəkildi, çaylar üzərində elektrostansiyalar quruldu, yaşıl energetika layihələri reallaşdırıldı. Bu gün Qarabağ və Zəngəzurda istehsal olunan yaşıl enerjinin 40 faizi regionun öz tələbatını ödəyir, qalan 60 faiz isə ölkənin digər hissələrində istifadə oluna və ya ixrac edilə bilər. Bu, Azərbaycana əlavə valyuta qazancı gətirəcək. Yeri gəlmişkən, qeyd edim ki, Nyu-Yorkda BMT Baş Assambleyasının 80-ci sessiyası çərçivəsində Prezident İlham Əliyev bir çox şirkətlərin rəhbərləri ilə, o cümlədən "Global Infrastructure Partners"in təsisçisi, sədri və baş icraçı direktoru Bayo Oqunles, "Franklin Templeton" şirkətinin baş icraçı direktoru və prezidenti Cenni Conson, "Ares Management" qlobal investisiya şirkətinin həmtəsisçisi və baş icraçı direktoru Maykl Aruqeti və başqaları ilə görüşüb. Bu görüşlərdə əsas müzakirə mövzularından biri Qarabağ və Şərqi Zəngəzura investisiya məsələləri olub".
Professor vurğulayıb ki, dövlətin yatırımları ilə yanaşı, artıq özəl və xarici investisiyalar da Qarabağa cəlb edilir: “Regionlara təkcə dövlət sərmayəsi qoyulmur, həm də özəl investisiyalar üçün xüsusi proqramlar var. Son illərdə xarici böyük şirkətlərin və nəhəng investorların marağı kifayət qədər yüksəkdir. Dövlət də seçici yanaşır — hansı şirkətlərin, hansı məqsədlə, hansı şərtlərlə dəvət ediləcəyini müəyyənləşdirir və onlara lazımi şərait yaradır".
Gələcək perspektivlərdən danışan R. Quliyev Qarabağın iqtisadi potensialına böyük ümid bəslədiyini deyib: “Fikrimcə, qarşıdakı 5–7 ildə bu ərazilərdə formalaşan iqtisadiyyat nəticəsində Azərbaycanın ümumdaxili məhsulu təxminən 15–20 faiz artacaq. Burada həm kənd təsərrüfatı, həm turizm, həm də istehsalat parkları inkişaf edəcək və yeni istehsal imkanları yaradacaq. "Böyük Qayıdış" proqramı uğurla davam edir və cənab Prezidentin tapşırıqları əsasında bu işlər daha da sürətlənəcək".
Mehriban Yariyeva
12:42 25.09.2025
Oxunuş sayı: 1249
