Paşinyan: Qısamüddətli populist qərarlardan imtina edilməlidir
Ermənistanın Baş naziri Nikol Paşinyan “Hərtərəfli təhlükəsizlik və dayanıqlılıq – 2025” konfransında çıxış edərək ölkəsinin təhlükəsizlik yanaşmalarını yenidən dəyərləndirdiyini bildirib. Onun sözlərinə görə, əvvəllər əsas hesab edilən hərbi-siyasi ittifaqlar və güclü ordu konsepsiyası Ermənistanın qarşısında duran problemləri həll etməyib.
Crossmedia.az bildirir ki, Paşinyan çıxışında Kollektiv Təhlükəsizlik Müqaviləsi Təşkilatının(KTMT) həmişə Azərbaycanın ərazi bütövlüyünü tanıdığını, bunun isə Ermənistan tərəfindən lazımi qədər dərk edilmədiyini vurğulayıb. O xatırladıb ki, Rusiya Prezidenti 2020-ci ilin noyabr və dekabrında Qarabağın beynəlxalq hüquq baxımından Azərbaycanın bir hissəsi olduğunu açıq şəkildə bəyan edib. Paşinyan qeyd edib ki, əgər ölkə öz ərazi bütövlüyünü dəqiq və legitim şəkildə tanımırsa, onda digər dövlətlərdən bunu gözləmək də mümkün olmur.
Baş nazir əlavə edib ki, 2022-ci il 6 oktyabrda Praqada Ermənistan və Azərbaycan arasında aparılan danışıqlar çərçivəsində ərazi bütövlüyünün qarşılıqlı tanınması məsələsi xüsusi önəm kəsb edib. O, Ermənistanın həm Azərbaycanın, həm də qonşuları olan Gürcüstan, İran və Türkiyənin ərazi bütövlüyünü tanıdığını, bunun da öz ərazi bütövlüyünün tanınması üçün zəruri addım olduğunu bildirib.
Paşinyan həmçinin vurğulayıb ki, Ermənistan ordusunun əsas vəzifəsi yalnız beynəlxalq səviyyədə tanınmış sərhədləri qorumaqdır. Onun fikrincə, ordunun təhlükəsizlik təminatında birinci yer tutması yanlış yanaşmadır. “Əgər təhlükəsizlikdə əsas vasitə ordu sayılırsa, deməli, təhlükəsizlik yoxdur”, – deyə o bildirib. Paşinyana görə, ordu sonuncu vasitə olmalı, əsas təhlükəsizlik dayağı isə dövlətin legitimliyi və beynəlxalq hüquqa əsaslanmasıdır.
Baş nazir çıxışında onu da qeyd edib ki, qısamüddətli populist qərarlardan imtina edilməlidir. “Bu gün bizi xəyanətkar adlandırsalar da, qəbul etdiyimiz qərarlar sayəsində 50, 100, 150 ildən sonra Ermənistan mövcud olacaq. Çünki əsas strategiyamız legitimlik üzərində qurulub”, – deyə Paşinyan bildirib.
Mehriban
16:01 15.09.2025
Oxunuş sayı: 874
