Küveyt 2060-cı ilə qədər karbon neytrallığına nail olmağı hədəfləyir
Küveyt 2060-cı ilə qədər karbon neytrallığına nail olmağı hədəfləyir.
Crossmedia.az xarici KİV-ə əsasən xəbər verir ki, bu barədə Küveyt Dövlətinin Vəliəhdi Şeyx Sabah Xalid əl-Həməd əl-Sabah Bakıda keçirilən BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının Liderlər Sammitinin açılış mərasimində bildirib.
Küveytin 2050-ci ilə qədər aşağı emissiyalı iqtisadi inkişaf modelinin bir hissəsi olaraq, o, bütün sektorlar, xüsusilə də təmiz enerji üzrə karbon emissiyalarının azaldılmasına diqqət yetirəcək.
Ölkə 2050-ci ilə qədər enerji balansında günəş enerjisinin 50% payına nail olmağı və 2040-cı ilə qədər istixana qazı emissiyalarını 40% azaltmağı planlaşdırır.
Küveyt, həmçinin Ərəb İqtisadi İnkişafı üzrə Küveyt Fondu vasitəsilə 27 milyard dollar kredit və qrant ayıraraq inkişaf etməkdə olan ölkələri fəal şəkildə dəstəkləyir.
Qeyd edək ki, noyabrın 11-də BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub. Dünən isə Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Liderlər Sammitinin açılış mərasimi keçirilib.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunacaq.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
Gültac Mehdizadə
09:26 13.11.2024
Oxunuş sayı: 7380
