İşçi sinifinə kim dəstək verir: Bayden, yoxsa Tramp?
Demokratların son seçkilərdə məğlubiyyətindən sonra partiya daxilində dərin bir mübahisə yaranıb: İşçi sinfinin etibarını itirmələrinin səbəbi onların siyasətləri idi, yoxsa mədəni fərqlər? Bu haqda Crossmedia.az axios.com saytına istinadən xəbər verir.
Co Bayden özünü işçi sinfinə ən çox dəstək verən prezident kimi tanıdıb. O, tətil edən işçilərin piketinə qoşulmuş, ittifaq pensiyalarını qorumuş və istehsalata böyük sərmayələr qoymuşdu. Lakin bütün bunlara baxmayaraq, çox sayda işçi sinfi seçicisi Donald Trampa üz tutdu. Kamala Harrisə dəstək kampaniyasında iştirak edən senator Bernie Sanders Demokrat Partiyasını sərt tənqid etdi. O, Demokratları “işçi sinfini tərk etməkdə” ittiham etdi və qeyd etdi ki, partiya rəhbərliyi “hazırkı vəziyyəti qorumağa çalışır”, halbuki amerikalılar dəyişiklik istəyir. Sandersin fikrincə, partiya əməkhaqqı bərabərsizliyini azaltmaq və yüksək tibbi xərcləri yüngülləşdirmək üçün ciddi addımlar atmayıb. O, partiyanın strateqləri və maliyyə dəstəkçilərinin bu məğlubiyyətdən dərs alacağına inanmır: “Yəqin ki, yox,” dedi. Sandersin bu tənqidlərinə Demokrat Partiyasının köklü simaları dərhal cavab verdilər. Demokratik Milli Komitənin sədri Jaime Harrison, Sandersin dediklərini “tamamilə yalan” adlandırdı.
Keçmiş Nümayəndələr Palatasının spikeri Nensi Pelosi isə Times-a verdiyi müsahibədə bildirdi ki, Kamala Harris Sandersin öz vətəni Vermontda belə ondan daha çox səs alıb. Pelosi əlavə etdi: “Biz işçi sinfinin partiyasıyıq, buna görə də Palatada bu il hər yerdə qırmızı rəngli xəritəyə baxmayaraq, irəlidəyik". Baydenin müttəfiqlərindən olan keçmiş senator Doug Jones da bu fikri dəstəkləyərək Baydenin iqtisadi bərpanı dəstəkləyən qanunlarını xatırlatdı. Demokrat Partiyasının işçi sinfi ilə əlaqələrinin zəifləməsi barədə yaranan müzakirələr iki fikir ətrafında cəmlənir. Birinci mövqe, partiyanın öz nailiyyətlərini yetərincə yaxşı çatdıra bilmədiyini düşünür. İkinci mövqe isə daha dərindir — Demokratların imici artıq bu seçicilər üçün cazibədar deyil, çünki “özünü tərifləyən elit” və “işçi sinfinin dəyərlərindən uzaq fəallar” kimi qəbul edilirlər. Məsələn, kənd Tramp bölgəsində yenidən seçilən Demokrat konqres üzvü Mari Gluesenkamp Perez Times-a verdiyi müsahibədə vurğulayıb: “Çox vaxt insanlar onlara yuxarıdan-aşağı yanaşıldığını hiss edir, bir çox seçilmiş nümayəndə qarşısındakı insanlara hörmətsizlik etdiyini anlamır". Demokratik strategiya qrupu Blueprint tərəfindən aparılan sorğular göstərir ki, tərəddüd edən seçicilərin Kamala Harris-i seçməmələrinin əsas səbəbi onun “trans məsələlərinə çox diqqət yetirməsi və orta sinifə kömək etməməsi” inancı olub. Əslində Harris və Demokratlar kampaniyada bu məsələlərə demək olar ki, toxunmamışdılar, lakin Respublikaçılar qadın idmanında trans məsələləri ilə bağlı reklamlar üçün təxminən 123 milyon dollar xərcləmişdilər. Hətta bu reklamların qaradərili və latino seçicilər arasında təsirli olduğu ortaya çıxıb.
Bəzi Demokratlar işçi sinfinin Tramp tərəfə keçməsinin daha sadə səbəbini deyiblər: COVID-dən sonra dünya üzrə artan inflyasiya. ABŞ iqtisadiyyatının “dünyanın qibtə obyekti” olduğu iddia edilsə də, inflyasiyanın ağrısını hiss edən insanlar üçün bu arqument əhəmiyyətini itirir. Konqres üzvü Gluesenkamp Perez deyir ki, “İnsanlar ərzaqlarını kredit kartlarına alır. Kiminsə onların şəxsi təcrübələrini bəzi iqtisadçıların məlumatları ilə danmağa çalışması mənasızdır". Tramp həmişə elitalara qarşı olan narazılığı effektli şəkildə səsləndirib. Bu il isə işçi sinfinə yönəlik daha cazibədar çıxışlar etdi: aqressiv vergi vədləri, McDonald’s-da çəkdirdiyi fotolar kimi geniş yayılan reklamlar. Onun işçi sinfi üçün verdiyi populist vədləri yerinə yetirə biləcəyi və qiymətləri endirə biləcəyi Demokratların diqqətlə izlədiyi bir sınaq olacaq. Pelosi deyir: “Əgər mesajlarımız və dəyərlərimiz barədə danışırıqsa, xalq böyük bir sürprizlə qarşılaşacaq".
Gülay Qəribova
23:14 10.11.2024
Oxunuş sayı: 13873
