Bu gün Azərbaycan mətbuatının 150 illik yubileyidir

“Mətbuat xalqın güzgüsüdür” – bu dərin mənalı fikir yazıma başlamaq üçün ən doğru seçimdir. Güzgü necə insanın zahiri görünüşünü əks etdirirsə, mətbuat da bir millətin düşüncələrini, dərdlərini, arzularını, hədəflərini, problemlərini və sevinclərini cəmiyyətin üzərinə olduğu kimi yansıdan aynadır. Bu güzgünü yaratmaq, onu parlaq və şəffaf saxlamaq isə asan başa gəlmədi. Bu yol min bir çətinliklər, əzablar, təzyiqlər və bəzən də həyat bahasına başa gələn fədakarlıqlarla dolu oldu.

XIX əsrdə Azərbaycan xalqı üçün ən vacib ictimai tələblərdən biri mətbuatın yaradılması idi. Ziyalılar, iş adamları, siyasi xadimlər və maarifpərvər insanlar bu arzunun gerçəkləşməsi üçün mübarizə aparırdı. Çünki əsrlərlə çar senzurasında boğulan bir xalqın səsi, fikri, dünyagörüşü və haqqı nəhayət eşidilməli idi. Bu səsi eşitdirmək istəyənlər çox olsa da, onu boğmaq istəyənlər də az deyildi. Lakin 1875-ci ildə nəşrə başlayan “Əkinçi” qəzeti bir dönüm nöqtəsi oldu – sübut etdi ki, bu xalqa susmaq yaraşmır.

“Əkinçi” sadəcə bir qəzet deyildi. O, xalqın ruhunu oyadan, düşüncəsinə işıq tutan, haqq və ədalət uğrunda yazan ilk tribunaydı. Həsən bəy Zərdabinin redaktorluğu ilə yayımlanan bu qəzet o dövrün ziyalılarını bir araya gətirdi, sözün həqiqi mənasında fikir meydanı yaratdı. “Əkinçi” təkcə maarifçilik ideyalarını yaymırdı, o, həm də gələcək mətbuat orqanlarına bir model, bir istiqamət, bir örnək idi. Zərdabi və onun silahdaşları göstərdilər ki, söz güclüdür, söz tərəqqi üçün silah ola bilər.

“Əkinçi”nin atdığı bu addım sonrakı dövrlərdə dalğa-dalğa yayıldı və yeni nəşrlərin yaranmasına təkan verdi. “Ziyayi-Qafqaziyyə”, “Kəşkül”, “Şərqi-Rus”, “Həyat”, “İrşad”, “Füyuzat”, “Molla Nəsrəddin”, “Tərəqqi” və başqa qəzet-jurnallar bu böyük dalğanın davamçıları oldu. Hər biri öz missiyası ilə, öz ideoloji xətti ilə xalqın maariflənməsinə, düşüncə azadlığının formalaşmasına xidmət etdi.

Məsələn, “Əkinçi” kənd təsərrüfatı sahəsində maarifçilik rolunu oynayaraq, kəndlilərə yeni əkin metodları və toxumlar haqqında bilgilər verirdi. “İrşad” qəzetində din elmlə yanaşı təqdim olunur, İslamın elmi aspektləri vurğulanırdı. “Həyat” qəzetində milli kimlik ön plana çəkilir, ümumtürk dil birliyi ideyası ilə xalqın şüuru oyadılırdı. “Molla Nəsrəddin” isə birbaşa sosial tənqid vasitəsi idi – savadsız mollalar, rüşvətxor məmurlar, zalım idarəçilər bu qəzetin satirik qələminin hədəfində idi. Bu nəşrlər yalnız maarifçiliklə kifayətlənməyib, həm də cəmiyyətin sosial, siyasi və mədəni problemlərini üzə çıxararaq xalqı düşünməyə, suallar verməyə, cavab axtarmağa vadar edirdi.

Lakin bu müqəddəs yol hər zaman çətinliksiz olmadı. Maarifə, tərəqqiyə çalışanların qarşısında həm xarici, həm də daxili maneələr vardı. Xarici təzyiqlər, senzura, təqiblər, sürgünlər bir tərəfdən, xalqın bir qisminin fanatizmi, savadsızlığı və müxtəlif ideoloji təsirlər altında maarifə qarşı çıxması digər tərəfdən bu yolu çətinləşdirirdi. Əhməd bəy Ağaoğlunun həyatına edilən sui-qəsd cəhdləri, şantaja məruz qalan qəzet redaksiyaları bu mübarizənin nə qədər sərt və amansız olduğunu göstərir. Azərbaycan ziyalıları iki cəbhədə – bir tərəfdən çar hökumətinə, digər tərəfdən cəhalətə və savadsızlığa qarşı mübarizə aparırdılar.

Amma bu mübarizə dayanmadı. Həsən bəy Zərdabi, Əli bəy Hüseynzadə, Cəlil Məmmədquluzadə, Üzeyir bəy Hacıbəyli, Mirzə Cəlil, Hüseyn Cavid və başqaları bir ideyanın, bir amalın yolçuları idilər – tərəqqi və maarifçilik. Onlar yazdıqları, yaratdıqları, mübarizə apardıqları hər sətrində bu xalqın gələcəyini düşündülər. Və bu gün onların hər birini minnətlə, sevgi ilə anırıqsa, deməli bu mübarizə qalibiyyətlə nəticələndi.

Bugünkü müstəqil Azərbaycan mətbuatı artıq 150 illik bir tarixi arxasında daşıyır. Bu tarix şərəfli, zəngin və eyni zamanda məsuliyyətlidir. Çünki bu mətbuat sadəcə informasiyanı ötürmək üçün yox, həm də cəmiyyətin maariflənməsi, vətəndaş şüurunun formalaşması və ədalətin bərqərar olması üçün çalışır. Biz bu gün azad mətbuatın səsini eşidiriksə, bu, 1875-ci ilin isti yay günündə “Əkinçi”nin ilk nömrəsini çapa verənlərin sayəsindədir.

Mətbuatın 150 illik yubileyi yalnız bir tarix deyil, həm də bir qiymətvermə, bir təşəkkür, bir öhdəlikdir. Bu yubiley bizə həm keçmişi xatırladır, həm də gələcək üçün məsuliyyətimizi artırır. Mətbuat – bu xalqın həm vicdanı, həm də düşüncə aynasıdır. Və bu ayna daim şəffaf, parlaq, doğrunun və haqqın tərəfdarı olmalıdır.

Azərbaycan mətbuatının 150 illik yubileyi münasibətilə Crossmedia.az olaraq mətbuatın tanınmış simalarından 150 illik şərəfli mətbuat yolu ilə bağlı fikirlərini aldıq:

Professor, BDU Jurnalistika fakültəsinin Mətbuat tarixi kafedrasının müdiri Cahangir Məmmədli:

Mətbuatımızın 150 illiyi Azərbaycan mədəniyyəti  və ədəbi-ictimai tarixində böyük bir hadisədir. Yəni mətbuatımız öz ilkin çağından 1875-ci ildən Zərdabinin əsasını qoyduğu mətbuatın keçdiyi yol sözün həqiqi mənasında şərəfli yoldur. Çünki Zərdabi bir məktəb yaratdı, o məktəb bütöv 150 ilin öyrənc yeri oldu. Nə qədər rus çarizminin senzurası çalışsa da, Azərbaycan mətbuatını ermənilərin əli ilə qarşısını almağa çalışsa da Azərbaycan cəmiyyəti və ziyalıları öz yollarını davam etdirdilər. Və biz 1900-cü ildə Molla Nəsrəddin məktəbi kimi, Şərqi-rus məktəbi kimi, Həyat qəzeti məktəbi kimi məktəblər keçdik. Bunlar sözün həqiqi mənasında məktəb oldular. Azərbaycan Xalq Cümhuriyyəti dövründə isə bütün dünyaya nümunə ola biləcək azad mətbuat nizamnaməsi yaratdı. Şərqin ən demokratik dövləti olan AXC həm də ən demokratik mətbuat nizamnaməsi yaratdı. Təsadüfi deyil ki, Heydər Əliyev Azərbaycan mətbuatı haqqında demişdi ki, “Azərbaycan mətbuatı AXC-nin yaratdığı mətbuatın yolunu davam etdirir”. O mətbuat xüsusilə Azərbaycan qəzeti seçilirdi. Bu günki mətbuatımızın inkişafına təkan verən hadisələrdən biri də Hafiz Paşayevin başçılığı, ideysı ilə Azərbaycan qəzetinin on cildiyinin transliterasiya olunmasıdır.

 1998-ci il avqustun 6-da Heydər Əliyevin Azərbaycan mətbuatı ilə bağlı olan əvvəlki illərdə, Xalq cəbhəsi dövründə bəhanə ilə qoyulmuş senzuraların ləğvi və mətbuatın azad elan olunması ilə bağlı olan sərəncamını prezidentimiz İlham Əliyev çox yüksək səviyyədə davam etdirir. 3 gün bundan əvvəl Şuşa Qlobal Media Formunda Azərbaycan mətbuatından nə qədər razı olduğunu ortaya qoydu. Məndə fəxr elədim ki, o jurnalistikanın formalaşmasında qocaman bir jurnalist kimi məndə iştirak etmişəm və mənim prezidentim bizi yüksək qiymətləndirdi.

Milli Məclisin deputatı, Əməkdar jurnalist Hikmət Babaoğlu:

Azərbaycan mətbuatı 150 il ərzində çox böyük inkişaf yolu keçərək müasir texnologiyaların və müasir informasiya resurslarının verdiyi bütün alətlərdən məharətlə istifadə etməyi bacaran mühüm bir instituta çevrilibdir. Mən təsadüfən institut sözünü işləytmirəm. Çünki bu gün media sadəcə maarifləndirmə və xəbərçilik funksiyasını yerinə yetirmir. Media informasiyanın bütün sahələri üzrə sistemli, vahid bir təşkilatlanmadır. Ona görə mənə elə gəlir ki, bu gün media dövlət üçün xalqımızın maraqları üçün, onun informasiya cəbhəsində savaşan əsgərləri hesab ediləcək qədər əhəmiyyətli bir vasitədir. Məhz bütün bunları nəzərə alaraq Azərbaycan prezidenti Şuşa Qlobal Media Forumunda Azərbaycan mətbuatının keçdiyi yolu və bugünki fəaliyyətini yüksək qiymətləndirdi. Bunun informasiya maraqlarımızı informasiya maraqlarımızı qorumağa qadir olan bir institut kimi dəyərləndirdi. Mən düşünürəm ki, bu əslində elə mediamızın 150 illiyinə Azərbaycan prezidentinin xüsusi bir təbriki idi.

BDU-nun kafedra müdiri, professor Qulu Məhərrəmli:

Bugünkü mətbuatı 100 il əvvəlki "Əkinçi" ilə müqayisə müəyyən rakursdan baxanda yaxşıdı. Amma digər tərəfdən, müasir medianın missiyası baxımından məqsədəuyğun deyil. Çünki "Əkinçi" bünövrəni qoyan, cəhalət və zülmət içində olan, özünün ictimai şüurunu formalaşdıra bilmədiyi dövrdə meydana çıxdı və tarixi missiya yerinə yetirdi. Bugünkü media ilə Əkinçi arasında maarifçilik və məlumatlandırmaq baxımından müəyyən oxşarlıqlar var. Amma Zərdabinin dediyi “hər vilayətin qəzeti o vilayətin güzgüsü olmalıdır” bu bir az düşündürücüdür ki, bugünkü media yaşadığımız cəmiyyətin güzgüsü ola bilirmi? Cəmiyyətin nöqsanlarını, problemlərini Əkinçi yanğısı ilə göstərə bilirmi? Bax bu məsələlərə biz diqqət yetirməliyik.

REAL Təhlil İnformasiya Mərkəzinin baş direktoru, Əməkdar jurnalist Mirşahin Ağayev:

Əvvəlcə, bütün həmkarlarımı ürəkdən təbrik edirəm. 150 il az deyil. Əsr yarımlıq müddətdə qələm özünün mürəkkəbqabı dövründən süni intellekt zamanına qədər uzun və mürəkkəb yol keçib. Yorulmuşuqmu? Yox əlbəttə. Çünki yolumuz elə bizik. “Mətbuatımızı necə dəyərləndirirəm?” Məncə bu sual mənə və ümumiyyətlə mətbuat işçilərinə verilməməlidir. Çünki biz məhz bu kontekstdə, dəyərləndirən yox, məhz dəyərləndirilənlərik. Münsiflər sırasında isə tamaşaçıdır, dinləyicidir, oxucudur. Yəqin onlardan soruşmaq lazımdır. Amma bunu mütləq söyləyəcəm:

-22 iyul “Əkinçi” qəzetinin yarandığı gündür. 150 ilin bu başında “Əkinçi”nin varisi olan çap mətbuatı ağır dövrünü yaşayır. Dünya dəyişir. Yeni çağırışlar yeni reallıqlar tələb edir. Çətindir. Ağırdır. Qəzet sürətlə dəyişən məlumatçılıqla ayaqlaşa bilmir. Amma heç nəyə baxmayaraq qəzetlər dünyasını dəyişməməli, canını yeni texnologiyalara tapşırıb getməməlidir. “Əkinçi” qəzeti, Həsən bəy Zərdabi öz mətbu övladlarının qəzet köşklərindən çıxarılaraq həmin “budkaların” qabağında müqəvva kimi, başında lələk hindu kimi dayanan bu gününü görməməli idi. Televiziya, radio, internet, süni intellekt və s. Ola bilər əlbəttə. Amma metrika kağızdan olur. Bizim metrikamız qəzetdir. Onu qorumaq lazımdır. Bütün həmkarlarıma məhz bunu arzulayıram:-QƏZETİ qorumağı. Dəyər odur. “Əkinçi”—mətbuatımızın çapar dövrü, at dövrüdür. İnkişaf edirik. Mühərrik avtomobildə də təyyarədə də, peykdə də olur. Amma onların qüvvəsi həmişə at gücü ilə ölçülür. Bu atdan düşməməliyik! Cilovumuz başqalarının əlində olmamalıdır! Müstəqil media, azad mətbuat Azərbaycandan, dövlətimizin maraqlarından ən çox asılı olanıdır. Hər birimizə bunu arzulayıram. Metrika üstümüzdə olmaya bilər. Amma ən etibarlı yerimizdə həmişə olmalıdır. Etalon odur: “Əkinçi”

BDU Jurnalistika fakültəsinin dekanı, Mətbuat Şurasının sədr müavini Vüqar Zifəroğlu:

Azərbaycan mətbuatının 150 illik tarixi, təkcə jurnalistikanın deyil, bütövlükdə xalqın milli düşüncə tərzinin, maarifçilik səviyyəsinin və ictimai şüurunun inkişaf tarixidir. Bu dövr, özündə həm tərəqqini, həm də çətinlikləri, həm azadlığı, həm də basqını daşıyan bir yol xəritəsidir. Hər bir mərhələ, bu tarixin özünəməxsus xüsusiyyətləri və ibrətamiz dərsləri ilə yadda qalıb. 1875-ci ildə Həsən bəy Zərdabinin təşəbbüsü ilə nəşr olunan “Əkinçi” qəzeti yalnız ilk Azərbaycan dilli qəzet deyil, həm də milli oyanışın rəmzi oldu. O dövrdə mətbuatın əsas vəzifəsi xalqı maarifləndirmək, savadsızlıqla mübarizə aparmaq və ictimai şüuru oyatmaq idi. Zərdabi və onun həmfikirləri mətbuatı “xalqın dili, xalqın aynası” hesab edirdilər.

Müasir dövr isə rəqəmsal inqilabın mətbuata gətirdiyi yeni çağırışlarla səciyyələnir. İnternet medianın, sosial şəbəkələrin, ümumiyyətlə informasiya texnologiyalarının inkişafı informasiya məkanını tamamilə dəyişib. Bu, bir tərəfdən daha geniş auditoriyaya çıxış imkanı yaratdığı halda, digər tərəfdən dezinformasiya, saxta xəbərlər və populist məzmunun yayılmasına da şərait yaradır.

Bütün bu mərhələləri nəzərdən keçirərək demək olar ki, Azərbaycan mətbuatı zaman-zaman sınaqlardan keçib, lakin öz mövcudluğunu qoruyub saxlayıb. O, bəzən susub, bəzən ucalıb, lakin daim cəmiyyətin aynası və sözün güzgüsü olub. Gələcəkdə isə bu güzgünün daha şəffaf, daha dürüst və daha güclü olması üçün həm jurnalistlərin, həm də bütünlükdə cəmiyyətimizin üzərinə böyük məsuliyyət düşür.

"Şərq" qəzetinin baş redaktoru, Əməkdar jurnalist Akif Aşırlı:

Azərbaycan mətbuatı 150 ildə məsuliyyətli, enişli-yoxuşlu , şərəfli bir tarixi yol keçib, tənəzzül mərhələsi də, inkişaf da yaşayıb, süstlük dövrünü arxada qoyub, bu günümüzə gəlib çatıb. Bu təkçə Azərbaycan jurnalistlərinin bayramı deyil, xalqın, millətin bayramıdır. Milli maraqları, peşə dəyərlərini öndə tutan, dövlət quruçuluğunda fəal rol oynayan fədakar jurnalistlərimiz bu şərəfli tarixlə öyünür, keçib – gəldikləri yola nəzər salır , yeni inkişaf istiqamətləri müəyyənləşdirir.

Həsən bəy Zərdabidən başlanan bu yolda jurnalistlərimiz maarifçilik missiyasını uğurla davam etdirib, milli ideologiyanı formalaşdırıb, bəzən də təbliğatçı funksiyaları yerinə yetirib, amma öz yolundan , peşə dəyərlərindən çəkinməyib, şəhid olub, qazi olub, söz səngərini heç vaxt tərk etməyib.

Bu gün də öz missiyasına sadiq qalıb, cəmiyyətin informasiya yükünü şərəflə daşıyır.

Bu bayram münasibətilə yönümündən , ideoloji baxışlarından asılı olmayaraq jurnalist peşəsinin dəyərlərini qoruyan bütün həmkarlarımızı təbrik edir, uğurlar diləyirəm, bayramımız mübarək.

Əməkdar jurnalist Tofiq Abbasov:

150 illik yol çox çətin, enişli-yoxuşlu yol olub. Bizim sələflərimiz çox böyük qəhrəmanlıq göstəriblər. Çünki biz həmişə demək olar ki, düşmən əhatəsində, qeyri-sağlam, qeyri-xoş, dözümlü bir şəraitdə formalaşmışıq. Və daim mübarizə bizim üçün həyat norması olub. Həmçinin biz daim yeni cəbhələrdə vuruşmalı olmuşuq. Mətbuatımızın yetkin hal almasında həqiqətən də sələflərimizin çox böyük rolu var. Jurnalistikanın bütün fundamental prinsiplərinə necə sahib çıxmışdılarsa bugün biz onlara yiyə dura bilmişik. Biz onları artıq qoruya bilirik. Təsadüfi deyil ki, müstəqilliyimizi bərpa etdiyimiz dövrdə də bizim mətbuatımız dövlətimizə bərabər vuruşur. Düşünürəm ki, biz atalarımızın irsini göz bəbəyi kimi qoruya bilirik. Öhdəmizə düşən vəzifələri duyuruq, anlayırıq. Öz taktikamız və strateji xəttimizi də düzgün müəyyən edirik.

Beynəlxalq Avrasiya Mətbuat Fondunun rəhbəri, Mətbuat Şurasının idarə heyətinin üzvü Umud Mirzəyev:

Azərbaycan mətbuatı 150 illik tarixində xalqımızın düşüncə tərzini formalaşdıran, milli oyanışa təkan verən, maarifçilik ideyalarını yayan və ictimai rəyə yön verən şərəfli bir yol keçib. “Əkinçi” qəzetinin işıq üzü görməsi ilə başlanan bu yol, zaman-zaman çətinliklərlə, senzura ilə və təzyiqlərlə üzləşsə də, həmişə cəmiyyətin vicdanı olmağı bacarıb. 30 illik işğal dövründə də Azərbaycan mediası səngərlərdə olub, torpaqlarımızın azadlıq mübarizəsində öz fəaliyyəti ilə seçilib. Bu isə medianın sadəcə xəbər dayşıyıcısı deyil, milli iradənin güclü təmsilçisi olduğunu bir daha sübut etdi. Azərbaycan mətbuatı bu gün mürəkkəb çağırışlar fonunda öz inkişafını davam etdirir, ictimai nəzarət funksiyasını qoruyur və vətəndaş cəmiyyətinin əsas sütunlarından biri olaraq qalır. Bu mənada, 150 illik mətbuat tariximiz təkcə keçmişin zəngin irsini daşımır, həm də müasirləşən dünyada vətəndaş məsuliyyətinin formalaşmasına töhfə verir.

Jurnalist Jalə Həsənli:

Jurnalistika mənim üçün sadəcə peşə deyil, həm də məsuliyyət və vicdan məsələsidir. Görünən hadisələrin görünməyən tərəflərini aşkara çıxarmaq, araşdırmaq, analiz etməkdir. Jurnalistika yalnız xəbər oxumaq deyil, o xəbəri yaza bilmək bacarığıdır, o xəbərə münasibət bildirmək cəsarətinə sahib olmaqdır. Sözün üçün qələminlə savaşa bilmək keyfiyyətinə malik olmaqdır. Mətbuatımızın 150 illik tarixinə öz cəsarəti, qələmi, sözü ilə düşən şəhid jurnalistlərimiz, yaşayan əfsanələrimiz var. Biz də onlardan ilhamlanıb bu yola çıxmışıq, onlar bizə vicdanla yazmağı, ədalət üçün susmamağı öyrədiblər. Bu 150 ildə mənim də zəhmətim, mənim də payım var. Bu gün Azərbaycan mətbuatında olmaqdan, sözümü mavi ekranlardan tamaşaçıya ötürə bilməkdən qürur duyuram.

Mətbuatımızın 150 illik tarixində qanlı günlər də, şanlı günlər də işıqlandırılıb. Şükürlər olsun ki, bu gün artıq azad torpaqlarımızdakı quruculuq, bərpa, qayıdış prosesi işıqlandırılır. Nə xoş bizə ki, bu gün beynəlxalq mətbuat Azərbaycanın qələbəsindən, zəfərindən yazır.

Bu 150 ildə jurnalistikanın üslubu, platforması çox dəyişib, amma bir şey sabitdir: doğru sözlə, həqiqətlə xalqa xidmət etmək. Mətbuat böyük bir gücdür. Cəmiyyətin düşüncəsinə yön verə bilən bir mexanizmdir. Ona görə də bu güc əlinə düşənin oyuncaq kimi davrandığı bir vasitəyə çevrilməməlidir. Azad söz “nə gəldi danışa bilərəm” demək deyil. Hər bir iddia fakta, sübuta söykənməlidir. Həsən bəy Zərdabi mətbuatı “xalq üçün güzgü” adlandırırdı. Mətbuat işçilərinin vəzifəsi həmin güzgünü təmiz saxlamaqdır. Medianın vəzifəsi reytinqə qaçmaq yox, cəmiyyət üçün faydalı olan dəyərləri qorumaqdır.

Bu əlamətdar gündə şəhid jurnalistlərimizi hörmət və sevgi ilə anır, klassik jurnalistikamızın yaşayan əfsanələrini, müasir mediada öz qələmi, sözü və cəmiyyətdəki mövqeyi ilə seçilən həmkarlarımı təbrik edir, müvəffəqiyyətlər arzu edirəm. Bayramımız mübarək!

Crossmedia.az Analitik İnformasiya Portalının Baş redaktoru Mübariz Göyüşlü:

Azərbaycan mətbuatı 150 illik tarixi boyunca şərəfli yol keçib. Həsən bəy Zərdabi çox böyük çətinliklərlə “Əkinçi” qəzetinin əsasını qoyaraq, həm də Azərbaycan mətbuatının şərəfli yolunu başlatmış oldu. Bu yolda çox böyük çətinliklərlə, problemlərlə, maneələrlə qarşılaşan jurnalistlərimiz bütün bunları dəf edərək, bugünkü günə qədər gəlib çıxmaq üçün böyük əmək və zəhmət sərf ediblər. Bu gün Azərbaycan mətbuatının peşəkarlığı, hadisələrə operativ reaksiya verməyi, vətənpərvərliyi, ideoloji və peşəkarlıq baxımından hazırlığı onu deməyə əsas verir ki, mətbuatımız artıq formalaşmış və yetkin bir mərhələyə çatıb. Azərbaycan mətbuatı bir çox keşməkeşli tarixi dövrlərdən keçərək bu günkü etibarlı və güclü mövqeyinə yüksəlib. Mətbuatımız bir neçə ideoloji sistemin şahidi olub, Azərbaycanın müstəqillik tarixi ilə birgə formalaşıb. Xalqın təşkilatlanması, onun mübarizə əzminin qorunması və təşkilində mühüm rol oynayıb.

İstər birinci Qarabağ müharibəsində, istərsə də Azərbaycan Respublikasının müstəqillik dönəmindəki çətin illərində Azərbaycan jurnalistləri hər zaman öz qələmləri ilə tarix yazıblar. Biz Azərbaycan jurnalistlərinin vətənpərvərliyinə, möhkəmliyinə, qəhrəmanlığına, xüsusən İkinci Qarabağ müharibəsində şahid olduq. Jurnalistlərimizin düşmənin informasiya təxribatına qarşı çox ciddi bir mübarizə apardıqlarını gördük. Azərbaycan xalqının məlumatlanmasında, maariflənməsində çox ciddi çalışmalar həyata keçirdilər.

Yəni, bütün bu tarixi inkişafı sistemləşdirib toplayaraq demək olar ki, “Əkinçi”dən, “Molla Nəsrəddin” və “Füyuzat” kimi maarifçi nəşrlərdən başlayan bu şərəfli yol bu gün layiqli əllərdədir. Müasir mətbuatın nümunələri və nümayəndələri bu yolu uğurla davam etdirir, tarix yazmaqda davam edirlər.

Onlar hər gün yalnız xəbər, yazı və məqalə verməklə kifayətlənmirlər. Hər gün fəaliyyətləri ilə millətin düşüncə tarixini formalaşdırırlar. Azərbaycan mətbuatına və jurnalistlərinə ən böyük qiyməti Azərbaycan Respublikasının Müzəffər Ali Baş Komandanı, cənab Prezident İlham Əliyev verdi. O, III Şuşa Qlobal Media Forumunda Azərbaycan mətbuatının fəaliyyətini yüksək qiymətləndirərək, jurnalistlərin vətənpərvərliyini xüsusi vurğuladı. Bu, bir daha təsdiqlədi ki, Azərbaycan jurnalistləri dövlətə, dövlətçiliyə, vətənə, millətə və xalqa ləyaqətlə xidmət göstərən, peşələrinin və işlərinin haqqını layiqincə verən böyük bir ordudur. Azərbaycan mətbuatını, həmkarlarımı 150 illik münasibətilə təbrik edirəm.

Ayhan