Süveyda vilayətində etnik təmizləmə: İsrailə bağlı silahlı qruplar dinc əhaliyə hücum edir
Suriyanın Süveyda vilayətindən Suriya ordusunun geri çəkilməsindən sonra bölgədə vəziyyət kəskin şəkildə gərginləşib. Məlumata görə, İsrailə bağlılığı ilə tanınan Hıkmat əl-Hicrinin rəhbərlik etdiyi silahlı separatçı qruplar bölgədə yaşayan Bəduin tayfalarına qarşı zorakı təmizləmə əməliyyatları həyata keçirirlər. Bu hücumlar nəticəsində onlarla insan – qadın və uşaqlar da daxil olmaqla – həyatını itirib. Hadisələr zamanı zorlamalar, baş kəsmələr, evlərin və məscidlərin yandırılması qeydə alınıb. Qadınlar və uşaqlar əşyasız və sığınacaqsız açıq sahələrdə qalmağa məcbur olublar. Silahlı şəxslər İsrail bayraqları qaldırır, qəbirləri təhqir edir və Hıkmat əl-Hicrinin tərənnüm olunmasını tələb edirlər.
Crossmedia.az xarici mediaya istinadən bildirir ki, əvvəlki dövrlərdə Suriya hökuməti ilə druz icmasının liderləri arasında bölgənin Suriyanın tərkibinə inteqrasiyasını nəzərdə tutan sülh razılaşması əldə olunmuşdu. Lakin əl-Hicriyə bağlı qruplar bu atəşkəsdən istifadə edərək etnik təmizləmə əməliyyatlarına başlayıblar və kürd bölgələrinə doğru separatçı dəhliz yaradılmasına çağırırlar.
Buna cavab olaraq Deyr əz-Zor, Dəraa və Əbu-Kəmal tayfaları bölgədə baş verən qırğınların qarşısını almaq üçün səfərbərliyə başlayıblar. Baniyas şəhərindəki əlevi icmasının nümayəndələri isə rəsmi Suriya hökumətinə və prezident Əhməd əl-Şəraa-ya dəstək ifadə edərək, ölkənin sabitliyinə təhdid yaradan bu cinayətləri qətiyyətlə pisləyiblər.
20:44 17.07.2025
Oxunuş sayı: 1166
