ASEAN ölkələri dünyada artan gərginliklərdən narahatdır – birgə bəyanat yayılıb
Cənub-Şərqi Asiya Ölkələri Assosiasiyasının (ASEAN) 58-ci Xarici İşlər Nazirləri görüşündən sonra üzv ölkələr birgə bəyanat yayıblar. Bəyanatda qlobal ticarətdə artan gərginlik, xüsusilə də əks-effektli tarif siyasətləri ilə bağlı narahatlıq ifadə olunub. ASEAN ölkələri bu cür iqtisadi tədbələrin dünya bazarında sabitliyə zərbə vurduğunu bildiriblər.
Crossmedia.az xarici mediaya istinadən bildirir ki, bəyanatda İsrail və İran arasında iyunun 24-də əldə edilmiş atəşkəsə riayət olunmasının vacibliyi vurğulanıb. Həmçinin, Qəzza zolağında hərbi əməliyyatların dərhal dayandırılması çağırışı edilib. ASEAN ölkələri mülki insanlara qarşı hücumları qəti şəkildə pisləyib və bölgədəki humanitar vəziyyətin pisləşməsindən ciddi narahatlıqlarını dilə gətiriblər.
Bəyanatda həmçinin Şimali Koreyanın qitələrarası ballistik raket sınaqlarını artırmasından və Koreya yarımadasında ümumi gərginliyin artmasından narahatlıq ifadə olunub. Üzv ölkələr beynəlxalq hüquqa hörmətlə yanaşmağa çağıraraq, bölgədə sülh və sabitliyin bərpasına dəstək verəcəklərini bildiriblər.
Ukraynada davam edən müharibəyə də toxunulan bəyanatda ASEAN ölkələri dərhal atəşkəsin təmin edilməsinə çağırıb və bütün tərəfləri danışıqlar masasına dönməyə dəvət ediblər. Birliyin fikrincə, münaqişənin diplomatik yollarla həlli insan tələfatının və iqtisadi böhranın qarşısını almağın əsas yoludur.
Fidan Qarayeva
19:13 11.07.2025
Oxunuş sayı: 959
