Qazaxıstan və Azərbaycan Avropanın neftlə təmin olunmasında mərkəzi rol oynayacaq - OPEC hesabatı
Qazaxıstan və Azərbaycan Avropanın uzunmüddətli perspektivdə neftlə təmin olunmasında getdikcə daha önəmli rol oynayacaqlar.
Crossmedia.az xəbər verir ki, bu haqda OPEC-in son hesabatında qeyd olunur.
Proqnoza görə, 2050-ci ilə qədər Avropaya xam neft və kondensat ixracı gündəlik 1,6 milyon barrelə yaxın səviyyəyə qədər sabitləşəcək. Bu rəqəm Rusiya neftinin Avropa İttifaqına maneəsiz şəkildə daxil olduğu dövrlərlə müqayisədə xeyli az olsa da, Xəzər regionundan, xüsusilə Qazaxıstan və Azərbaycandan olan alternativ tədarükçülərin artan strateji əhəmiyyətini vurğulayır.
OPEC hesabatında qeyd olunur ki, Aİ-nin Rusiya neftinə tətbiq etdiyi embarqo ənənəvi tədarük marşrutlarının dəyişilməsinə səbəb olub. Proqnozlara əsasən, Rusiyadan və ümumilikdə Xəzər regionundan idxal 2024-cü ildəki 1,8 milyon bareldən 2030-cu ilədək bir qədər azalaraq gündəlik 1,7 milyon bareldən aşağı düşəcək və proqnoz dövrünün sonunda gündəlik 1,6 milyon barelədək enəcək. Bu tədarüklərin əsas hissəsini Rusiya mənşəli olmayan həcmlər təşkil edəcək və onların böyük hissəsi Qazaxıstanla Azərbaycanın payına düşəcək.
OPEc-in qiymətləndirmələrinə görə, Rusiya neftinin Avropaya ixracının münaqişədən əvvəlki səviyyələrə qayıtması real görünmür. Bu isə Qazaxıstan və Azərbaycanın Avropa bazarı üçün etibarlı və uzunmüddətli tədarükçü kimi mövqelərini gücləndirir.
18:42 10.07.2025
Oxunuş sayı: 9598
