Milli Məclisin vitse-spikeri Cross Media-ya açıqlama verdi: Ermənistan başa düşməlidir ki, sülhün alternativi yoxdur
İyulun 10-da Əbu-Dabidə Azərbaycan Prezidenti İlham Əliyevlə Ermənistanın Baş naziri Nikol Paşinyan arasında keçirilən görüş Cənubi Qafqazda sülhün və sabitliyin təmin olunması istiqamətində önəmli addım kimi qiymətləndirilir. Görüş konstruktiv və qarşılıqlı anlaşma ruhunda keçib, tərəflər arasında real fikir mübadiləsi aparılıb, sərhədlərin delimitasiyası, Zəngəzur dəhlizinin açılması və sülh sazişinə hazırlıq kimi əsas məsələlər müzakirə olunub. Bu dialoq, danışıqlar prosesində yeni və daha praktik mərhələyə keçidi göstərsə də, Ermənistanın konkret razılaşmalara əməl edib-etməyəcəyi və geri addım atıb-atmayacağı hələlik açıq olaraq qalır.
Mövzu ilə bağlı Milli Məclisin vitse-spikeri Musa Qasımlı Crossmedia.az-a açıqlama verib: “Hər şeydən əvvəl, görüşdən öncəki yaranmış müsbət atmosfer tərəflərin sülhə doğru atdıqları addımların göstəricisidir. Bu görüş sərhədlərin delimitasiyası və kommunikasiyaların açılması istiqamətindəki səylərin bir hissəsidir. Azərbaycan Respublikasının Xarici İşlər Nazirliyinin məsələ ilə bağlı verdiyi açıqlama dövlətimizin mövqeyini ifadə edir. Ermənistan başa düşməlidir ki, mehriban qonşuluq və sülhün alternativi yoxdur. Əgər Ermənistan normal, inkişaf edən bir ölkəyə çevrilmək istəyirsə, o zaman sülhə gəlməlidir. Amma sülhə mane olan qüvvələr bu yolda səylərini əsirgəməyəcəklər. SSRİ Dövlət Təhlükəsizlik Komitəsinin təsiri altında olan erməni kilsəsinin fəaliyyəti həmişə sülh yolunda əngəl olub. Bundan əlavə, sülhə mane olan qüvvələr Ermənistanda terror aktları təşkil edə, qarşıqlıq sala bilərlər. Əbu-Dabidə keçirilən görüş Cənab Prezidentimizin sülhün nə qədər vacib olduğuna dair mövqeyini göstərdi. Bundan sonra hər şey Ermənistandan asılıdır. Möhkəm sülhün qurulmasından ötrü ona əngəl olan amillərdən biri - əsassız ərazi iddialarının əks olunduğu sənədlər ləğv olummalıdı və sülh sazişi imzalanmalıdır”.
Mehriban Yariyeva
16:34 10.07.2025
Oxunuş sayı: 1083
