ABŞ-nin “süper F-16” filosu Şimali Koreya sərhədində yerləşdirildi
ABŞ Hərbi Hava Qüvvələri, Koreya yarımadasında artan nüvə təhdidlərinə qarşı cavab tədbiri olaraq yüksəldilmiş F-16 döyüş təyyarələrindən ibarət filonu Cənubi Koreyaya göndərib.
Crossmedia.az xəbər verir ki; 51-ci Qırıcılar Filosunun yaydığı rəsmi açıqlamaya əsasən, Yaponiyanın Misava Hava Bazasından gətirilən bu təyyarələr 26-27 iyun tarixlərində Osan Hava Bazasında yerləşdirilib.
Müasir texnologiyalarla təchiz edilən bu F-16-lar, beşinci nəsil təyyarələrə yaxın imkanlara malikdir və bu sayədə həm sağ qalma bacarığı, həm də döyüş sistemlərinin dəqiqliyi baxımından əhəmiyyətli üstünlüklər təqdim edir.
ABŞ ordusu ötən yay Osan bazasında ilk “süper F-16 filosunu” formalaşdırmışdı. Bu ilin oktyabr ayında isə eyni bazada ikinci bir super filonun yaradılması planlaşdırılır. Hər bir filoda 31 ədəd döyüş təyyarəsi olacaq.
Bu təşəbbüsün məqsədi Koreya yarımadasında hərbi hazırlığı və müharibə qabiliyyətini artırmaqdır.
Hazırda ABŞ-nin Cənubi Koreyada 28 min 500-dən çox hərbi qulluqçusu var. Rəsmi olaraq Şimali və Cənubi Koreya hələ də texniki cəhətdən müharibə vəziyyətindədir, çünki 1953-cü ildə yalnız atəşkəs sazişi imzalanıb, sülh müqaviləsi yox.
F-16 təyyarələri həm ABŞ, həm də Cənubi Koreya tərəfindən geniş şəkildə istifadə edilən çoxməqsədli 4-cü nəsil döyüş təyyarələri hesab olunur.
F-16-ların Cənubi Koreyaya köçürülməsi yalnız bu ölkənin müdafiəsini gücləndirmir, eyni zamanda Yaponiyadakı ABŞ hərbi hava qüvvələri ilə koordinasiyanı da artırır.
Bu addım, Hind-Sakit okean bölgəsində birgə hava gücünü möhkəmləndirərək mümkün təhdidlərə qarşı daha sürətli və effektiv reaksiya qabiliyyəti yaradacaq.
Pentaqonun ötən il verdiyi açıqlamaya görə, Misava bazasındakı 36 F-16-nın yaxın gələcəkdə 48 ədəd F-35A ilə əvəzlənməsi planlaşdırılır. Lakin neçə təyyarənin Cənubi Koreyaya göndərildiyi və əlavə transferlərin olub-olmayacağı hələ dəqiqləşməyib.
ABŞ Hərbi Hava Qüvvələri bildirib ki, bu modernləşdirmə prosesi “inkişaf edən təhdidlərin önünə keçmək və hava üstünlüyünü qorumaq üçün” davam edəcək.
Mədinə Cəlilova
21:30 09.07.2025
Oxunuş sayı: 6121
