Kiyevə raketlər yağdı: Müharibənin ən böyük hava hücumu Trampın silah qərarından sonra baş verdi
Ukrayna Prezidenti Volodimir Zelenski ölkənin indiyədək Rusiyadan gördüyü ən böyük hava hücumuna məruz qaldığını açıqlayıb. Hücum, ABŞ-nin keçmiş prezidenti Donald Trampın Ukraynaya hərbi yardımların bərpasını elan etməsindən dərhal sonra baş verib.
Crossmedia.az Ukrayna mətbuatın istinadən xəbər verir ki, Zelenskinin sözlərinə görə, çoxsaylı dalğalar şəklində həyata keçirilən hücum zamanı Ukraynanın müxtəlif şəhərlərinə 728 pilotsuz uçuş aparatı (PUA) və 13 ballistik raket atılıb.
Ukrayna lideri hücumu “çox mənalı” adlandıraraq bildirib:
“Bu hücum barışa və atəşkəsə nail olmaq üçün ciddi səylərin göstərildiyi bir dövrdə həyata keçirilib. Lakin Rusiya bu səylərin hamısını davamlı olaraq rədd edir”.
Gecə saatlarında baş verən hücum, Trampın ABŞ-nin Ukraynaya hərbi yardımını davam etdirəcəyinə dair verdiyi açıqlamadan dərhal sonra qeydə alınıb. Həmin açıqlama, ötən həftə qəbul edilmiş yardımın dayandırılması qərarını təkzib edən bir addım kimi qiymətləndirilib. ABŞ mediası Trampın bu qərardan əvvəlcədən xəbərsiz olduğunu yazıb.
Tramp son çıxışında Rusiya Prezidenti Vladimir Putinlə bağlı narazılığını açıq şəkildə ifadə edərək deyib:
“Putin bizə çoxlu saçmalıq yaşadır, açıq danışsaq. Bizə qarşı həmişə nəzakətli davranır, amma bunun heç bir mənası yoxdur”.
Kremlin sözçüsü Dmitri Peskov isə bu sözlərə cavab olaraq bildirib ki, “Biz bu məsələdə kifayət qədər sakitik. Trampın üslubu belədir – sərt və kəskin ifadələrlə danışır”.
Tramp və Putin arasında davamlı təmasların olduğu bilinsə də, bu görüşmələr indiyədək Ukraynada atəşkəsə dair konkret nəticə verməyib. Tramp daha əvvəl “bir günə atəşkəsi təmin edə biləcəyini” iddia etmişdi. Ötən həftə Putinlə telefon danışığından sonra isə belə deyib:
“Çox narazıyam. O, tam sürətlə irəliləmək istəyir, insanları öldürməyə davam edir. Bu, heç də yaxşı deyil”.
Trampın bu tənqidləri, ABŞ rəhbərliyinin Ukraynaya yardımı dayandıracağına dair bəyanatla eyni vaxta təsadüf edib. Lakin qərarın ləğvindən sonra Ukraynaya 10 ədəd “Patriot” raket sistemi göndərilməsi gündəmə gəlib.
Ukrayna rəhbərliyi, Rusiyanın artan raket və PUA hücumlarına qarşı bu hava hücumundan müdafiə sistemlərinə böyük ümid bəsləyir. Ölkənin şərq vilayətləri və paytaxt Kiyev daima atəş altında olsa da, Ukraynanın heç bir bölgəsi Rusiya hücumlarından tamamilə sığortalanmayıb.
Mədinə Cəlilova
21:15 09.07.2025
Oxunuş sayı: 7498
