Hindistanda hərbi təyyarə qəzası: 2 pilot həlak olub
Hindistan Hərbi Hava Qüvvələrinə məxsus döyüş təyyarəsinin qəzaya uğraması nəticəsində iki pilot həyatını itirib. Hadisə ölkənin qərbində yerləşən Racastan ştatının Çuru bölgəsində baş verib.
Crossmedia.az xəbər verir ki, rəsmi açıqlamaya görə, qəza “rutin təlim uçuşu” zamanı baş verib və qəza zamanı Jaguar Trainer tipli təyyarə yerə çırpılıb. Qeyd olunur ki, hadisə nəticəsində heç bir mülki əmlaka zərər dəyməyib.
Qəzanın səbəblərinin müəyyən edilməsi üçün araşdırmalara başlanılıb.
Bildirək ki, Jaguar jeti Böyük Britaniya və Fransa istehsalı olan hərbi təyyarədir. Bu il apreldə də Hindistanın qərbində yerləşən Qucarat ştatında bir başqa Jaguar döyüş təyyarəsinin qəzaya uğraması nəticəsində bir pilot həlak olmuşdu.
Mədinə Cəlilova
20:45 09.07.2025
Oxunuş sayı: 7116
