ABŞ Cənubi Qafqazda yeni diplomatik mərhələyə keçir: Vitkoffun Bakı səfəri, İrəvana sanksiya xəbərdarlığı
Diplomatik mənbələrdən əldə edilmiş məlumatlara əsasən, Donald Trampın yaxın komandasında yer alan və hazırda diplomatik vasitəçilik missiyası həyata keçirən Stiv Vitkoffun sonuncu Moskva səfəri çərçivəsində Bakıya da səfəri baş tutub.
Crossmedia.az xəbər verir ki, Vitkoffun Azərbaycan paytaxtında təxminən 8 saata yaxın çəkən görüşlərində regional sülh gündəliyinə dair bir sıra kritik mesajlar verilib.
Moskvada Rusiya rəhbərliyi ilə keçirdiyi görüşdə Stiv Vitkoff açıq şəkildə bildirib ki, Rusiya eyni anda həm Ukrayna, həm də Cənubi Qafqaz cəbhəsində uğur qazana bilməz. Əgər Moskva Cənubi Qafqazda güzəşt tələb edirsə, bu halda Ukraynada müəyyən güzəştlərə razı olmalıdır.
Lakin Rusiya prezidenti Vladimir Putin bu yanaşmanı rədd edib və Qafqaz məsələsinə görə Ukraynada güzəştə getməyəcəyini açıq şəkildə ifadə edib.
Səfərdən dərhal sonra, ABŞ Dövlət Departamentinin Avrasiya məsələləri üzrə rəhbər heyəti Ermənistanın xarici işlər naziri və baş nazir Nikol Paşinyanla əlaqə saxlayıb. Paralel olaraq, ABŞ Senatının təsirli simalarından olan Marko Rubio prosesə birbaşa müdaxilə edib. Ermənistan tərəfinə bildirilib ki, əgər rəsmi İrəvan konstitusiyasındakı Azərbaycana qarşı iddiaları aradan qaldırmaqdan imtina edərsə, ABŞ tərəfindən sanksiyaların tətbiqi gündəmə gələ bilər. Eyni zamanda Ermənistanın Rusiyaya sanksiyaları aşmaq üçün yardım etməsi faktları da açıq şəkildə araşdırmaya cəlb olunacaq.
Azərbaycan tərəfi Vitkoffa bildirib ki, Bakı sülh anlaşmasının imzalanmasına tam hazırdır. Lakin Ermənistanın daxili siyasi vəziyyəti, revanşist əhval-ruhiyyənin güclü olması və konstitusiyada yer alan ərazi iddiaları Bakı üçün ciddi narahatlıq mənbəyidir.
Vitkoff bu narahatlıqları qeyd edib və məsələni şəxsən Donald Trampa çatdıracağını, ABŞ-nin bu istiqamətdə fəal vasitəçi rolunu davam etdirəcəyini bildirib.
Stiv Vitkoffun vasitəçilik planı aşağıdakı mərhələləri əhatə edir:
1. Azərbaycan və Ermənistan liderlərinin neytral məkanda ilk görüşü;
2. Baza və ya çərçivə sazişinin bir və ya bir neçə görüş nəticəsində imzalanması;
3. Sülh anlaşmasının rəsmi imzalanma yeri və tarixinin müəyyənləşdirilməsi;
4. ATƏT-in Minsk Qrupunun hər iki ölkə tərəfindən buraxıldığının elan olunması;
5. Azərbaycan və Ermənistanın ayrı-ayrılıqda ABŞ-la yeni ticarət anlaşmaları imzalaması;
6. Sülh sazişinin Aİ-nin vasitəçiliyi ilə əldə edilmiş baza prinsiplərinə uyğun şəkildə yekunlaşdırılması;
7. Aİ tərəfindən hər iki ölkəyə iqtisadi dəstək paketlərinin təqdim olunması;
8. Bütün bu prosesin müəyyən edilmiş vaxt çərçivəsində və davamlı görüşlərlə həyata keçirilməsi.
Bu təşəbbüs ABŞ-nin regionda yeni balanslı diplomatik missiyasını ifadə etməklə yanaşı, həm də Qafqazda davamlı sülh üçün real mexanizmlərin tətbiqinə yönəlmiş ciddi cəhd kimi qiymətləndirilir.
20:00 09.07.2025
Oxunuş sayı: 680
