Qırmızı dənizdə Husi hücumu: 3 ölü, xilasetmə gedir
Qırmızı dənizdə Yəməndəki Husi silahlı qruplaşmasının hücumuna məruz qalan “Eternity C” adlı yük gəmisində axtarış-xilasetmə əməliyyatları aparılır. Gəminin ekipaj üzvlərindən azı üç nəfər həlak olub, iki nəfər isə yaralanıb.
Crossmedia.az xarici mediaya istinadən bildirir ki, hücuma məruz qalan gəmi Yunanıstana məxsusdur və Liberiya bayrağı altında üzürdü. Gəmi bazar ertəsi gecə kiçik qayıqlardan və bomba daşıyan dronlardan atəşə tutulub. Husi qruplaşmasının hücumundan sonra gəmi ciddi zədələnib, hərəkət qabiliyyətini tam itirib.
Böyük Britaniya hərbi qüvvələrinin idarə etdiyi Birləşmiş Krallığın Dəniz Ticarəti Əməliyyatları Mərkəzinin (UKMTO) məlumatına görə, “Eternity C” gəmisində olan şəxslərin axtarışı üzrə əməliyyat gecə saatlarından başlayıb. Hazırkı mərhələdə beş ekipaj üzvü xilas edilib.
Yük gəmisi hücum zamanı Süveyş kanalına doğru hərəkətdə olub. Rəsmi mənbələr gəminin vəziyyəti ilə bağlı tam məlumat verməsə də, hadisənin beynəlxalq dənizçilik təhlükəsizliyi baxımından ciddi narahatlıq doğurduğu bildirilir.
18:36 09.07.2025
Oxunuş sayı: 709
