"Azərbaycan diplomatiyası ötən illər ərzində əldə etdiyi nailiyyətlərlə öyünə bilər" - Deputat
Bu gün Azərbaycanda milli diplomatiyanın formalaşmasında mühüm rol oynayan, ölkəmizin beynəlxalq aləmdə tanınması və maraqlarının qorunması istiqamətində əhəmiyyətli xidmətlər göstərən diplomatların peşə bayramıdır – Diplomatiya Günüdür. Bu əlamətdar gün, Azərbaycanın xarici siyasət tarixinin mühüm mərhələlərini xatırlamaq və diplomatik xidmət orqanlarında çalışan şəxslərin fəaliyyətinə dəyər vermək baxımından xüsusi önəm daşıyır.
Milli Məclisin deputatı Hikmət Babaoğlu bu günün əhəmiyyəti haqqında Crossmedia.az-a danışıb: "Hər bir xalqın milli diplomatiyası, onun milli gücünün beynidir. Azərbaycan milli diplomatiyası böyük təcrübə və yol keçərək, milli maraqlarımızın qorunması, həyata keçirilməsi istiqamətində çox böyük uğurlar əldə edib. Biz ötən illər ərzində diplomatiyamızın, xalqımızın maraqlarını necə ifadə etdiyini ən müxtəlif diplomatik platformalarda necə uzaqgörən və milli gələcəyimizin perspektivlərinə hesablanmış addımlar atdığını görürük. Diplomatiya həm də çox çətin və şərəfli bir peşədir. Çünki diplomatlarımızın fəaliyyət məkanı tək Azərbaycanla məhdudlaşmır. Beynəlxalq təşkilatlarla, xarici ölkələrlə münasibətlərdə sadəcə diplomat kimi yox, həm də azərbaycanlı kimi dövlətimizi təmsil etmək imkanları yaranır. Bu mənada düşünürəm ki, Azərbaycan diplomatiyası ötən illər ərzində xüsusən son dövrlərdə əldə etdiyi nailiyyətlərlə öyünə bilər".
Ayhan
14:45 09.07.2025
Oxunuş sayı: 5627
