Abdullah Öcalan 26 ildən sonra ilk dəfə videomüraciət yayımladı: PKK silahları yerə qoyur
PKK lideri Abdullah Öcalan 26 ildən sonra ilk dəfə videomüraciətlə çıxış edərək təşkilatın tərksilah olunması ilə bağlı çağırış edib. O, silahların deyil, siyasətin və sosial sülhün gücünə inandığını bildirib: "Mən sizi bu prinsipi həyata keçirməyə dəvət edirəm."
Crossmedia.az bildirir ki, Öcalan videomüraciətində regionda baş verən son hadisələrin bu tarixi addımın aktuallığını və əhəmiyyətini açıq şəkildə göstərdiyini vurğulayıb. Onun sözlərinə görə, silahların könüllü olaraq yerə qoyulması və hərtərəfli parlament komissiyasının formalaşdırılması prosesin əsas açarıdır. O, ehtiyatlı davranmağın, günahlandırma oyunlarından və dar düşüncələrdən qaçmağın vacibliyini də xüsusi qeyd edib.
PKK lideri çıxışında vurğulayıb ki, artıq praktik addımlar tələb edən bir mərhələyə çatılıb və bu addımlar tarixi kimi dəyərləndirilməli, onlara ciddi yanaşılmalıdır. O, həmçinin bəyan edib ki, PKK ayrı bir dövlət yaratmaq məqsədindən və vaxtilə əsaslandığı milli azadlıq müharibəsi strategiyasından imtina edib. Hərəkat artıq başqalarını inkar edən və milli dövlət gündəmini güdən bir qurum olaraq fəaliyyətinə son qoyur.
10:46 09.07.2025
Oxunuş sayı: 948
