Türkiyənin ilk iqlim qanunu təsdiqlənib
Türkiyənin ilk iqlim qanunu ölkə Prezidenti Rəcəb Tayyib Ərdoğanın imzaladığı sənədə əsasən, rəsmi qəzetdə - “Resmi Gazete”də dərc olunaraq təsdiqlənib.
Crossmedia.az xəbər verir ki, Türkiyənin iqlim dəyişikliyi ilə mübarizənin əsas prinsiplərinin müəyyən edildiyi qanuna görə, “ortaq, lakin fərqləndirilmiş məsuliyyət və nisbi imkanlar” əsas götürüləcək.
Əsas prinsipləri bərabərlik, iqlim ədaləti, ehtiyatlılıq, iştirakçılıq, inteqrasiya, davamlılıq, şəffaflıq, ədalətli keçid və irəliləyiş yanaşmaları olan qanuna əsasən, yerli iqlim dəyişikliyinə dair fəaliyyət planları hazırlanacaq, ehtiyaclar və risklər müəyyənləşdiriləcək.
Qanunda iqlim dəyişikliyi ilə mübarizə, sera qazı emissiyalarının azaldılması, strategiya və fəaliyyət planlarının hazırlanması, bununla bağlı şəhərlərdə görüləcək tədbirlər, maliyyə və investisiya məsələləri, Emissiya Ticarət Sisteminin (ETS) yaradılması, sera qazı emissiyası yaradan müəssisələr üçün nəzərdə tutulan tətbiq, ozon qatını incəldən maddələrə, eləcə də, sera qazı emissiyası və florlu qazlarla bağlı pozuntulara görə nəzərdə tutulan cəzalar, qanunun tətbiqi üçün keçid müddəti kimi maddələr yer alır.
Qeyd edək ki, bu qanunla Türkiyə, iqlim dəyişikliyinə qarşı hüquqi əsaslara dayanan ilk sistemli mübarizə dövrünə keçid edir.
09:27 09.07.2025
Oxunuş sayı: 8140
