"Azərbaycan hər zaman ədalətli sülhün tərəfdarıdır" -DEPUATAT
Azərbaycan Xarici İşlər Nazirliyinin mətbuat katibi Ayxan Hacızadənin İslam Əməkdaşlıq Təşkilatının İstanbul Xarici İşlər Nazirləri Şurasında qəbul olunmuş qərarlarla bağlı Ermənistan Xarici İşlər Nazirliyinin bəyanatına dair şərh verib. Bildirilib ki, rəsmi Bakı Ermənistan Xarici İşlər Nazirliyinin “İstanbul Bəyannaməsi” və İslam Əməkdaşlıq Təşkilatının (İƏT) Xarici İşlər Nazirləri Şurasının 51-ci sessiyasında qəbul edilmiş qətnamələrlə bağlı 23 iyun 2025-ci il tarixli əsassız bəyanatını qətiyyətlə rədd edir.
Diqqətə çatdırılıb ki, Ermənistanın bu sənədlərin məzmununu təhrif etmək və tarixi faktları saxtalaşdırmaq cəhdi onun sülh prosesinə xələl gətirmək və beynəlxalq ictimaiyyəti çaşdırmaq səylərinin daha bir nümunəsidir.
"İƏT-in qəbul etdiyi qətnamələr, o cümlədən “indiki Ermənistan ərazisindən zorla və sistemli şəkildə qovulmuş azərbaycanlıların geri qayıtmaq hüququ” adlı qətnamə tarixi faktları əks etdirir və beynəlxalq hüquq və ədalət prinsiplərinə əsaslanır. Ermənistanın iddialarının əksinə olaraq, azərbaycanlıların indiki Ermənistandan sistemli şəkildə qovulması könüllü deyil, zorakılıq, hədə-qorxu və insan hüquqlarının kobud şəkildə pozulması ilə yadda qalıb. İƏT-in azərbaycanlıların geri qayıtmaq hüququnu dəstəkləməsi Ermənistanın əsassız şəkildə təqdim etdiyi “ərazi iddiası” deyil, ədalətə və onların fundamental hüquqlarının bərpasına çağırışdır.
700 mindən artıq azərbaycanlını köçkün vəziyyətinə salmış və 2023-cü ildə Azərbaycanın suverenliyinin bərpası ilə yekunlaşmış Azərbaycan ərazilərinin Ermənistan tərəfindən təxminən 30 il davam edən qanunsuz işğalı kontekstini nəzərə alaraq, Ermənistanın 2023-cü il antiterror tədbirlərinə dair iddiası da eyni dərəcədə əsassızdır", - A.Hacızadənin şərhində vurğulanıb.
"İƏT-in Xocalı soyqırımı ilə bağlı Ermənistanın “təhrif olunmuş şərh” kimi rədd etdiyi qətnaməsi 1992-ci ilin fevralında Xocalıda qadın və uşaqlar daxil olmaqla, 613 dinc sakinin vəhşicəsinə qətlə yetirilməsi zamanı Ermənistan silahlı qüvvələrinin törətdiyi qəddarlıq barədə danılmaz həqiqəti bir daha təsdiq edir. İnsanlıq əleyhinə bu cinayət beynəlxalq insan haqları təşkilatları tərəfindən sənədləşdirilib və bir çox ölkələr tərəfindən tanınıb. Ermənistanın, bu və digər hərbi cinayətlərə, o cümlədən işğal zamanı Azərbaycanın mədəni irsinin dağıdılmasına görə məsuliyyətini etiraf etməkdən yayınması onun sülh prosesində etibarını daha da sarsıdır.
Ermənistanın sülhə sadiqlik iddiası onun hərəkətləri ilə uyğun gəlmir. Azərbaycan ardıcıl olaraq, ərazi bütövlüyü və suverenliyə qarşılıqlı hörmət əsasında hərtərəfli sülh sazişinin tərəfdarı olduğu halda, Ermənistan dəfələrlə kritik məsələlər üzrə qeyri-konstruktiv mövqe nümayiş etdirməklə tərəqqiyə mane olub.
İƏT-in Ermənistanı gecikmədən sülh sazişinin imzalanmasına maneələri aradan qaldırmağa çağırması beynəlxalq ictimaiyyətin Cənubi Qafqazda davamlı sabitliyi təmin edən həll üzrə gözləntiləri ilə üst-üstə düşür.
Ermənistanın İƏT-in prinsipial mövqeyini siyasiləşdirmək və öz hərəkətlərinə görə məsuliyyətdən yayınmaq cəhdləri Azərbaycanı ədalətli və davamlı sülh əldə etmək səylərindən çəkindirməyəcək. Ermənistanı revizionist ritorikasından əl çəkməyə və tarixi məsuliyyətlərini etiraf etməyə çağırırıq", - XİN rəsmisi əlavə edib.
Bu barədə Crossmedia.az-a danışan Milli Məclisin deputatı Müşfiq Məmmədli bildirib ki, regionda baş verən son proseslər, xüsusilə İsraillə İran arasındakı münaqişələr, eləcə də keçmiş MDB məkanında Rusiya və Ukrayna arasındakı qarşıdurma bir daha göstərdi ki, sülhün təmin olunması olduqca vacib və zəruridir: "Xüsusən də 44 günlük Vətən müharibəsi və ondan sonra həyata keçirilən antiterror əməliyyatları nəticəsində Azərbaycan öz tarixi ədalətini bərpa edib. Bu, həm regionun sabitliyi və inkişafı, həm də gələcəkdə bu kimi təhlükələrdən sığortalanmaq baxımından çox mühümdür.Azərbaycanın atdığı bu addımlar təkcə ölkəmizin deyil, həm də bütövlükdə regionun rifahına xidmət edir. Azərbaycan tarixi ədaləti bərpa etdi və bu həm regionun inkişafı, həm də hər iki ölkənin gələcəyi üçün vacibdir. Ermənistan hakimiyyəti dəfələrlə sülh gündəmini dəstəklədiyini bəyan etsə də, bu istiqamətdə atılan real addımlar gözləniləndən fərqlidir. Yaxın zamanlarda Ermənistan rəsmiləri səviyyəsində verilən açıqlamalarda hətta bu gün belə sülh danışıqlarını yekunlaşdırmağa və ya sülh aktını imzalamağa hazır olduqları bildirilsə də, praktiki addımlar həmin bəyanatlarla üst-üstə düşmür".
Deputat vurğulayıb ki, Ermənistan tərəfinin davamlı olaraq verdiyi ziddiyyətli açıqlamalar, qeyri-sabit və zigzaqvari mövqeləri münaqişənin sülh müqaviləsi ilə başa çatmasına əngəl yaradır: "Artıq yekunlaşmış münaqişənin – Azərbaycanın beynəlxalq hüquq çərçivəsində ədaləti bərpa etdiyi bu mərhələnin – sülh müqaviləsi ilə nəticələnməsi olduqca önəmlidir. Bu baxımdan Azərbaycan Xarici Siyasət Dairəsinin verdiyi açıqlamalar mühüm əhəmiyyət kəsb edir. Azərbaycan sülhə, amma yalnız ədalətli və qarşılıqlı hörmətə əsaslanan bir sülhə tərəfdardır. Azərbaycan hər zaman tərəfdardır ki, bu sülh o sülh olsun ki, heç bir qonşunun digər qonşuya ərazi iddiası olmasın və bəyan edilən sözlər əməli işlərlə üst-üstə düşsün”.
Fatimə Nəbiyeva
16:54 24.06.2025
Oxunuş sayı: 1298
