Azərbaycan Suriya ilə təhsil və tədqiqat sahəsində əməkdaşlığı genişləndirir
Azərbaycanın Dəməşqdəki müvəqqəti işlər vəkili Elnur Şahhüseynov və Suriyanın ali təhsil və elmi tədqiqatlar naziri Mərvan əl-Xələbi ali təhsil, elmi tədqiqatlar və bilik mübadiləsi sahəsində əməkdaşlıq perspektivlərini müzakirə ediblər.
Crossmdia.az xəbər verir ki, görüş Dəməşqdəki nazirlik binasında keçirilib.
Tərəflər rəqəmsallaşdırma və kibertəhlükəsizlik sahələrində, Suriya universitetlərinin standartlarının yüksəldilməsi və akkreditasiyası, həmçinin tələbə mübadiləsi proqramlarının bərpası və birgə elmi tədqiqatların, aktual araşdırmaların və bilik mübadiləsinin təşviq edilməsi istiqamətində qarşılıqlı fəaliyyəti gücləndirməyi razılaşdırıblar.
E.Şahhüseynov təcrübə mübadiləsi, elektron sistemlərin inkişafı və beynəlxalq akkreditasiyanın əldə edilməsi üçün potensialı qeyd edib. O, həmçinin Azərbaycanın suriyalı tələbələr üçün müxtəlif fənlər, xüsusilə tibb, mühəndislik və texnologiya sahələri üzrə 25 təqaüd ayırdığını vurğulayıb.
Nazir əl-Xələbi ikitərəfli onlayn görüşlərin keçirilməsinə və əməkdaşlığın daha da inkişaf etdirilməsi üçün koordinasiya komitəsinin yaradılmasına hazır olduğunu təsdiqləyib.
18:45 19.06.2025
Oxunuş sayı: 9342
