"Nəqliyyat xərcləri artacaq, logistikada problemlər yaranacaq" - PROQNOZ
Avropada təbii qazın qiyməti İran və İsrail arasında artan gərginlik fonunda 4,5% bahalaşıb. Londonun ICE birjasının məlumatına görə, Niderlandın TTF habında iyul ayı üzrə fyuçerslərin dəyəri 1000 kubmetr üçün 453 ABŞ dollarına (1 MVt·saat üçün 38 avro) çatıb.
Müşahidə olunan tendensiya barədə Crossmedia.az-a danışan iqtisadçı, professor, dörd çağırış deputatı Rüfət Quliyev qeyd edib ki, təbii sərvətləri, o cümlədən nefti, qazı olan ölkələrdə hərbi konflikt, müharibə, gərginlik qiymətlərə təsir edir: "Hətta elə olur ki, hansısa dünya lideri, məsələn Çin lideri Si Cinpin Pekində çıxış edir və bir neçə saat sonra, axşam qiymət qəfil dəyişir. Bu, normal haldır".
İqtisadçının sözlərinə görə, qiymətlərin hansı səviyyəyə qədər artacağını demək mümkün deyil: " Qaz tək İrandan gəlmir. Türkmənistandan, Azərbaycandan, Rusiyadan da qaz ixrac olunur. Amma istənilən böyük siyasətçinin çıxışı nəticəsi birja qiymətlərinə kifayət qədər təsir edir. Bu hər zaman olub və olacaq".
O, həmçinin nəqliyyat xərclərinin də artacağını deyib: " Nəqliyyat xərcləri artacaq, logistikada müəyyən qədər problemlər yaranacaq. Çünki İranın ərazisindən kifayət qədər mallar keçir. Müəyyən qədər sərhədlərdə problemlər yaranacaq".
Fatimə Məmmədova
17:00 13.06.2025
Oxunuş sayı: 1054
