KİV: “Rusiya Ukraynanın dron hücumlarına sərt cavab hazırlayır”
ABŞ-nin “The New York Times” (NYT) nəşri Rusiya ərazisindəki hərbi hava bazalarına edilən son hücumlara görə Moskvanın Ukraynaya qarşı sərt cavab addımları atmağa hazırlaşdığını yazıb.
Crossmedia.az-ın xəbərinə görə, nəşrin ABŞ administrasiyasındakı anonim mənbələrə istinadən dərc etdiyi materialda bildirilir ki, Ukrayna Təhlükəsizlik Xidmətinin (SBU) həyata keçirdiyi hücumlar nəticəsində Rusiyaya məxsus, dəyəri 100 milyon dollardan artıq olan hərbi təyyarələr sıradan çıxarılıb.
Qeyd olunur ki, hücumlar cəmi 600 dollar dəyərində olan FPV tipli pilotsuz uçuş aparatları vasitəsilə reallaşdırılıb.
Rəsmilərin fikrincə, bu hücumlar Rusiya ordusunun Ukraynada apardığı hərbi əməliyyatlara ciddi təsir göstərməyəcək. Bununla belə, Moskvanın yaxın vaxtlarda “ciddi cavab” verməsi gözlənilir.
ABŞ kəşfiyyatı Rusiyanın dəqiq hansı addımları atacağını müəyyənləşdirməsə də, mülki infrastruktur və enerji obyektlərinə dron hücumları, eləcə də ballistik raket zərbələri ehtimallar arasında göstərilir.
Vaşinqton bu hücumlar barədə əvvəlcədən məlumatlandırılmayıb
Məlumata əsasən, Kiyev bu hücumlarla bağlı ABŞ-ı əvvəlcədən məlumatlandırmayıb. Səbəb olaraq, Vaşinqtonun belə əməliyyatlara mənfi yanaşacağının ehtimal edilməsi göstərilir.
Rusiya Müdafiə Nazirliyi: Hərbi hava bazalarına dron hücumları edilib
Rusiya Müdafiə Nazirliyi də yayımladığı rəsmi açıqlamada Murmansk, İrkutsk, İvanovo, Ryazan və Amur vilayətlərində yerləşən hərbi hava bazalarının FPV tipli dronlarla hücuma məruz qaldığını təsdiqləyib.
Açıqlamada bəzi təyyarələrin alovlandığı bildirilib və hücumlar “terror aktı” kimi qiymətləndirilib.
Ukrayna: Rusiyanın strateji aviasiyasına milyardlarla dollar zərər vurulub
Ukrayna Təhlükəsizlik Xidməti (SBU) isə yayımladığı məlumatda bu hücumların “Pavutini” (“Hörümçək toru”) adlı xüsusi əməliyyat çərçivəsində həyata keçirildiyini bəyan edib. SBU-nun iddiasına görə, hücumlar nəticəsində Rusiyanın strateji qanadlı raket daşıyan təyyarələrinin 34 faizi sıradan çıxarılıb və ümumilikdə 7 milyard dollar həcmində zərər vurulub.
Hazırda bölgədə gərginliyin daha da artması ehtimal olunur. Rusiyanın cavab addımlarının dəqiq məzmunu isə yaxın günlərdə bəlli olacaq.
Aybəniz Səfərova
00:32 04.06.2025
Oxunuş sayı: 11343
