“Air Astana” Bakı–Atırau–Bakı marşrutu üzrə ilk müntəzəm reysini həyata keçirib
Mayın 31-də Heydər Əliyev Beynəlxalq Aeroportunda Qazaxıstanın “Air Astana” aviaşirkətinin Atıraudan Bakıya ilk uçuşunun təntənəli qarşılanma mərasimi keçirilib.
Crossmedia.az xəbər verir ki, bu barədə Qazaxıstanın Azərbaycandakı səfirliyinin mətbuat xidməti məlumat yayıb.
İlk sərnişinləri səfir Alim Bayel, “Air Astana” aviaşirkətinin nümayəndələri və Bakı aeroportunun rəhbərliyi qarşılayıb.
Səfir Alim Bayel qeyd edib ki, ölkələr arasında əlaqələrin intensivliyinin göstəricilərindən biri onlar arasında uçuşların sayıdır.
"Biz şadıq ki, reyslərin sayı artır və ölkələr arasında uçuşların coğrafiyası genişlənir. Bu yay Qazaxıstanla Azərbaycan arasında uçuşların sayı həftədə 34 dəfəyə çatacaq. Eyni zamanda biz icazə verilən uçuşların sayını 70-ə çatdırırıq. Yəni artım davam edəcək. İndi Bakıdan Astana, Almatı və Aktauya təyyarələr uçur. Buraya Çimkent şəhəri də əlavə olunacaq”, - diplomat bildirib.
Atırau-Bakı reysləri həftədə üç dəfə bazar ertəsi, çərşənbə və şənbə günləri yerinə yetiriləcək. Uçuş müddəti 1 saat 30 dəqiqədir.
17:22 01.06.2025
Oxunuş sayı: 1244
