Qürur səhifəsi: Şərqdə İstiqlalın adı - Azərbaycan
Tarixin qızıl səhifələrini yalnız qılıncın gücü ilə deyil, qəlbin cəsarəti, düşüncənin maarifi və xalqın iradəsi ilə yazmaq mümkündür. 28 May 1918-ci il məhz bu cəsarətin və iradənin tarixə həkk olunduğu gündür. O gün Azərbaycan Cümhuriyyəti elan edilərək, Şərqdə və bütün İslam aləmində ilk dəfə olaraq demokratik, dünyəvi, hüquqi dövlət quruldu. Bu, təkcə bir siyasi hadisə deyil, həm də bir mədəni inqilab, milli dirçəliş və ideoloji yüksəliş idi.
XX əsrin əvvəllərində Qafqaz coğrafiyasında baş verən siyasi hadisələr, Çar Rusiyasının süqutu və regionda yaranan hakimiyyət boşluğu Azərbaycan xalqı qarşısında tarixi bir məsuliyyət qoydu.
Millətin öndə gedən maarifçiləri, ziyalıları və mübariz siyasətçiləri Tiflisdə 28 may 1918-ci il tarixində İstiqlal Bəyannaməsini qəbul etdilər. Azərbaycan xalqı azad, bərabər hüquqlu və demokratik əsaslara söykənən bir dövlətin – Azərbaycan Cümhuriyyətinin – sahibi oldu.
Azərbaycan Cümhuriyyəti yalnız Azərbaycan xalqının deyil, bütövlükdə Şərq dünyasının siyasi tarixində ilk dəfə demokratiya, hüquq, qadın bərabərliyi və dünyəvilik prinsiplərini əsas tutan bir idarəetmə modeli təqdim etdi. Əsas nailiyyətlərindən bəziləri isə bunlardır: qadınlara seçki və seçilmə hüququ verildi, çoxpartiyalı parlament formalaşdırıldı və siyasi plüralizm təşviq olundu, ana dilimiz – Azərbaycan dili dövlət dili elan edildi, milli ordu quruldu, Bakı Dövlət Universiteti təsis olundu, dövlət rəmzləri – üçrəngli bayraq, gerb, himn qəbul edildi.
Azərbaycan Cümhuriyyəti cəmi 23 ay yaşasa da, onun qoyduğu təməl müstəqil Azərbaycanın ideoloji və hüquqi əsasını təşkil etdi. 1920-ci ilin aprelində Sovet Rusiyasının təzyiqi ilə süquta uğrasa da, xalqın yaddaşından silinmədi. Onun azadlıq və müstəqillik ruhu 1991-ci ildə Azərbaycanın yenidən istiqlaliyyətini bərpa etməsinə aparan yolun mayakına çevrildi.
Ümummilli lider Heydər Əliyev çıxışlarının birində söyləmişdir: Müstəqilliyi qorumaq, saxlamaq o müstəqilliyi əldə etməkdən qat-qat çətin bir vəzifə idi”. Ulu öndər Heydər Əliyevin bu fikri sadəcə bir ifadə deyil, milli dövlətçilik strategiyasının əsas qayəsi, xalqın qarşısında qoyulan strateji hədəf kimi səslənir. Bu fikir Azərbaycanın dövlət siyasətinin əsas sütunlarından birinə çevrilmiş, həm daxili, həm də xarici siyasətdə özünü açıq şəkildə göstərmişdir. Bu ruhun yenidən dirçəldilməsi yolunda Ulu Öndər Heydər Əliyevin rolu əvəzsiz oldu. 17 noyabr 1990-cı il tarixində Naxçıvan Ali Məclisinin sədri Ulu Öndər Heydər Əliyev Azərbaycan Cümhuriyyətinin üçrəngli bayrağını yenidən rəsmi dövlət rəmzi kimi qaldırdı. Bu, yalnız bir bayraq deyil, bütün bir xalqın yaddaşına, ruhuna və gələcəyinə verilmiş nəfəs idi.
Hər il Müstəqillik Günü münasibətilə dünya ölkələrinin liderləri cənab prezident İlham Əliyevə təbrik məktubları göndərirlər. Bu təbriklər, Azərbaycanın beynəlxalq aləmdəki nüfuzunun göstəricisidir. Müstəqil Azərbaycan Respublikası Azərbaycan Cümhuriyyətinin hüquqi və siyasi varisidir. Bu gün ölkə başçısı cənab prezident İlham Əliyevin rəhbərliyi ilə Azərbaycanın dövlətçiliyi möhkəmlənmiş, beynəlxalq nüfuzu artmış, milli maraqları uğurla qorunur. 2020-ci il 44 günlük Vətən müharibəsində əldə olunan Qarabağ Zəfəri də sübut etdi ki, Azərbaycan artıq yalnız tarixə arxalanan yox, tarix yazan bir dövlətdir.
Müstəqillik Günü ilə bağlı dövlət başçısı cənab İlham Əliyev tərəfindən verilən rəsmi bəyanatlar, xalqa ünvanlanan təbriklər və keçirilən tədbirlər tarixə olan ehtiramın bariz nümunəsidir. Azərbaycan Respublikasının Prezidenti cənab İlham Əliyev qeyd edir ki, 1918-ci il tarixində qurulan Cümhuriyyətin ömrü qısa olsa da, onun ideyaları bu gün müasir Azərbaycanın əsas dayaqlarından biridir.
Azərbaycan Cümhuriyyəti təkcə keçmişimizin bir parçası deyil, milli ideologiyamızın təməli, hüquqi irsimiz və mənəvi dayağımızdır. Onun yaratdığı dəyərlər – azadlıq, demokratiya, bərabərlik bu gün də bizim yolumuzu işıqlandırır. Ümummilli lider Heydər Əliyevin dediyi kimi, müstəqilliyi qorumaq böyük zəhmət tələb edir, bu, həm də millətin iradəsinin güc göstəricisidir. Ümummilli lider Heydər Əliyevin müdrik kəlamı bu gün də aktuallığını qoruyur. Müstəqillik sadəcə bayram günü xatırlanacaq bir hadisə deyil, hər gün qorunmalı, inkişaf etdirilməli və gələcək nəsillərə əmanət edilməli olan bir milli dəyərdir. Onun qorunması üçün hər bir vətəndaşın üzərinə məsuliyyət düşür. Bu məsuliyyəti dərk etmək və ona uyğun davranmaq isə müstəqil dövlətin gələcəyini təmin edəcək əsas amildir.
“Qürurla deyirik: Şərqdə istiqlalın adı – Azərbaycandır!”
Nigar Abdullayeva
YAP Yasamal rayonu AMEA Folklor İnstitutu üzrə ərazi partiya təşkilatının sədr müavini
15:57 27.05.2025
Oxunuş sayı: 6077
