"Bakıkart" necə "vətəndaşların cibinə girir"? - Vətəndaşlar narazıdır
Son zamanlar bəzi vətəndaşlar ictimai nəqliyyatdan istifadə edərkən onlayn ödəniş əməliyyatlarından istifadə zamanı balansdan vəsaitin çıxılması, lakin ödənişin qarşı tərəfə çatmaması ilə bağlı narahatlıqlarını bildirirlər. Bu cür hallar əsasən, bank əməliyyatlarının texniki səbəblərdən düzgün və səmərəli icra olunmaması ilə əlaqədardır . Xüsusilə də bu hallar "Bakıkart" müşahidə olunur. Belə ki, sərnişin tətbiq vasitəsilə iki dəfə ödəniş etməyə çalışsa da "Etibarsızdır" bildirişi ilə qarşılaşıb. Buna baxmayaraq, kartının balansından 2 gedişlik məbləğ çıxılıb. Həmçinin, ictimai nəqliyyatdan istifadə edən digər sərnişinlər də bu cür halların yaranmasından narahatlıqlarını bildirirlər.
Bu barədə Crossmedia.az-a danışan nəqliyyat eksperti Aslan Əsədov bununla bağlı bir neçə hala rast gəlindiyini bildirib:
"Bu bank əməliyyatları ilə bağlı ola bilər. Burada əsas məqam bank əməliyyatlarının, yəni proqramlaşmanın düzgün və səmərəli olmamasından ibarətdir. Yəni vəsait çıxıb, amma düzgün istiqamətdə xərcləməyib. Düzgün istiqamət üzrə xərclənməyən vəsait müştərinin balansına oturmalıdır. Bu, əlbəttə, vətəndaşları narahat edən faktdır".
Ekspert bildirib ki, bu barədə ölçü götürüləcək və aidiyyatı qurumlar öz müdaxiləsini edəcəklər ki, belə hallar yaşanmasın:
"Əks halda vətəndaşlarımız narahatlıq keçirəcək. Müəyyən ödəmə və digər məsələlərdə problemlərlə daim qarşılaşacaqlar".
Qeyd edək ki, "Bakıkart"dan bildirilib ki, balansdan çıxılan məbləğ iki iş günü ərzində kartın balansına qaytarılmalıdır.
Fatimə Məmmədova
12:13 21.05.2025
Oxunuş sayı: 10270
