Qanunda vacib dəyişiklik: "Vərəsəlik hüququ..."- Alqışlandı
Azərbaycanda vərəsəlik hüququ ilə bağlı qanunvericiliyə dəyişiklik təklif olunur. Yeni dəyişiklik layihəsinə əsasən, miras açıldıqdan sonra vərəsə onu qəbul etmədən vəfat edərsə, onun ilkin mirasdan almalı olduğu pay, artıq onun öz vərəsələrinə ümumi qaydada keçəcək.
Bu məsələ “Torpaq Məcəlləsi”, “Mülki Məcəllə”, “Mülki Prosessual Məcəllə”, eləcə də “Notariat haqqında” və “İcra haqqında” qanunlara təklif olunan dəyişikliklər çərçivəsində Milli Məclisin Aqrar siyasət komitəsinin iclasında müzakirəyə çıxarılıb.
Məsələ ilə bağlı Crossmedia.az-a açıqlama verən hüquqşünas Əliməmməd Nuriyev təklifin əhəmiyyəti və mümkün hüquqi nəticələri barədə fikirlərini bölüşüb.
O bildirib ki, bu məsələ hazırda hüquqi gündəmin əsas mövzularından biridir və həm mülki hüquq, həm də ailə münasibətləri baxımından olduqca əhəmiyyətlidir: “Yeni vərəsəlik təklifi ailə hüququ və ədalət prinsipinin qorunması baxımından mühüm təşəbbüsdür. İndiyədək vərəsə mirası qəbul etmədən vəfat etdikdə onun payı digər vərəsələr arasında bölüşdürülürdü. Bu isə bəzi hallarda mərhum şəxsin ailəsinin hüquqdan məhrum qalmasına səbəb olurdu.
“Yeni təklif bu ədalətsizliyi aradan qaldırır və ailə hüququnun davamlılığını təmin edir. Bu dəyişiklik ilk növbədə ailə daxilində mülkiyyətin qorunmasına xidmət edir, eyni zamanda ailə bağlarının hüquqi sabitliyinə müsbət təsir göstərir”, – deyə hüquqşünas vurğulayıb.
Müsahibimiz, həmçinin əlavə edib ki, bu təcrübə artıq Almaniya və Fransa kimi bir sıra Avropa ölkələrinin qanunvericiliyində mövcuddur və beynəlxalq hüquqi tendensiyalara uyğundur.
Bununla yanaşı, hüquqşünas gələcəkdə bu dəyişikliklərin tətbiqi zamanı bəzi hüquqi və praktiki çətinliklərin yarana biləcəyinə də diqqət çəkib. Onun sözlərinə görə, bu çətinliklərdən biri sübutetmə mexanizmləri ilə, digəri isə mirasın dairəsinin genişlənməsi nəticəsində yarana biləcək hüquqi mübahisələrlə bağlıdır: "Bəzi hallarda vəfat etmiş şəxsin mirası qəbul edib-etmədiyinə dair saxta sübutların ortaya çıxarılması riski də var. Buna görə də bu məsələdə təsdiq mexanizmləri – notarius və ya məhkəmə qərarı ilə təsdiqlənmə vacibdir”.
O, eyni zamanda Mülki Məcəlləyə bu məsələnin nəsil üzrə vərəsəlik hüququ kimi ayrıca maddə ilə əlavə edilməsini də məqsədəuyğun hesab edib.
Sonda hüquqşünas qeyd edib ki, təklif humanizm və ailə prinsiplərinin gücləndirilməsi baxımından mütərəqqi olsa da, hüquqi texnikanın dəqiq işlənməsi və boşluqların aradan qaldırılması gələcəkdə mümkün mübahisələrin qarşısını almaq üçün vacibdir.
Səbinə Cəlilova
15:40 20.05.2025
Oxunuş sayı: 14349
