Bruklin körpüsündə faciə: Meksika iki hərbiçi tələbəsini itirdi
ABŞ-ın Nyu-York şəhərində yerləşən Bruklin körpüsündə baş verən gəmi qəzası Meksikada dərin hüznlə qarşılanıb. Şənbə günü Meksika Donanmasına məxsus ARM Cuauhtemoc adlı yelkənli təlim gəmisinin körpüyə çırpılması nəticəsində iki gənc Hərbi Dəniz Qüvvələri tələbəsi – 20 yaşlı America Sanchez və 23 yaşlı Adal Jair Maldonado Marcos həyatını itirib.
Crossmedia.az xəbər verir ki, bu barədə “BBC” məlumat yayıb.
Hadisə zamanı gəminin üç dirəyi körpüyə çırpılaraq sınıb. Gəmidə olan 277 nəfərlik heyətdən 22 nəfər xəsarət alıb, onlardan üçünün vəziyyəti ağırdır. America Sanchez qəza anında dirəklərdən birinin üzərində olub.
Meksika Donanması Komandanı Admiral Pedro Raymundo Morales, səhhəti qaydasında olan bütün heyət üzvlərinin yaxın günlərdə vətənə qaytarılacağını bildirib. America Sanchez-in nəşinin doğulduğu Veracruz şəhərindəki Hərbi Dəniz Akademiyasına aparılması planlaşdırılır.
Sanchez-in anası Rocio Hernandez qızını “dəniz mühəndisi olmaq arzusu ilə yaşayan fədakar və nümunəvi bir tələbə” kimi təsvir edib. O, qızının 15 yaşını qeyd etdiyi mərasimindən qalan geyim və fotolarla bəzədilmiş, gül-çiçəklərlə örtülmüş xatirə guşəsi önündə qızına son ehtiramını bildirib.
Qəzanın dəqiq səbəbləri araşdırılır. Meksika ictimaiyyəti və rəsmiləri baş verən faciə ilə bağlı dərin kədər içində olduqlarını bildiriblər.
Nigar Rəhimova
18:24 19.05.2025
Oxunuş sayı: 9545
