Kim Çen In: “Ukraynalıları məhv etmə əmri verdim”
Şimali Koreya lideri Kim Çen In Ukraynaya qarşı müharibədə Rusiya ilə hərbi əməkdaşlığın məlum olduğunu bildirib. O, Rusiyanı dəstəkləmək üçün ordusunu yenidən səfərbər etməyə hazır olduğunu deyib.
Crossmedia.az xarici mediaya istinadən xəbər verir ki, 9 May Nasist Almaniyasının məğlubiyyətinin qeyd olunduğu Qələbə Günü münasibətilə Pxenyandakı Rusiya səfirliyinə səfəri zamanı çıxış edən Kim, Şimali Koreya mediası tərəfindən yayımlanan nitqində Rusiya ilə əlaqələrin güclənməsindən məmnunluğunu ifadə edib.
İki ölkə arasında hərbi ittifaqın ən parlaq dövrünü yaşadığını bildirən Kim, Qələbə Gününün 80 illiyində Rus həmkarları ilə bir araya gəlməsini, “neo-nasizm təhdidini dəf etmək və dünya sülhünə töhfə vermək istiqamətində ortaq və dəyişməz iradənin sübutu” adlandırıb.
Kim Çen In müasir nasizmin dünyada sürətlə yayıldığını qeyd edərək, bu ideologiyanın bəşəriyyət üçün ciddi təhlükə olduğunu bildirib.
O, Rusiyanın Ukraynada apardığı hərbi əməliyyatları “dünya sülhünü və təhlükəsizliyini təmin edən” addım kimi dəyərləndirib və bildirib: “Rusiyanın suverenliyini pozan düşmən qüvvələrin hərbi təxribatlarını ölkəmizə qarşı təcavüz kimi görürəm. Bu səbəbdən orduma Rusiya Silahlı Qüvvələri ilə əməkdaşlıq edərək ukraynalı neo-nasist işğalçıları məhv etmə və Kursk bölgəsini azad etmə əmri verdim”.
Kim, Şimali Koreya əsgərlərinin Rusiya torpağında öz doğma vətənləri kimi mübarizə apardığını vurğulayaraq, Kursk əməliyyatında iştirak edən bütün hərbçilərin Koreya-Rusiya ittifaqının gücünü sübut etdiyini deyib.
Kim Çen In həmçinin, Ukrayna ordusunu “Kiyevli neo-nasistlər” adlandıraraq, Rusiyaya dəstəyin tam legitim olduğunu iddia edib. “Ordumuzun müharibəyə qatılmasını tənqid edənlər bir daha düşünsün. Əgər Ukrayna qüvvələri Rusiya torpaqlarını işğal etməyə cəhd etməsəydi, bizim ordu ilə qarşılaşmaq məcburiyyətində qalmazdılar,” deyə o bildirib.
Kim, ABŞ və müttəfiqlərinə xəbərdarlıq edərək deyib ki, “əgər kukla Ukrayna qüvvələrinin nüvə dövlətinin torpaqlarına hücumu cavabsız qalsaydı, bu, düşmənlərimizi daha da cəsarətləndirərdi”. O, belə bir vəziyyətdə Cənubi Koreya ordusunun da “daha cəsarətli hərəkətlərə keçəcəyini” deyib.
Şimali Koreya lideri əlavə edib ki, əgər ABŞ və Qərb müttəfiqləri Rusiyaya qarşı hərbi təcavüzdən əl çəkməsələr, o zaman ordusuna hücumu dəf etmək üçün hərəkətə keçmək əmri verəcək. Kim bu əmri “müqəddəs bir vəzifə” adlandıraraq, “ədalət və qələbə Rusiyanın olacaq” sözlərini səsləndirib.
Mədinə Cəlilova
15:40 10.05.2025
Oxunuş sayı: 707
