Avropa liderlərindən Kiyevə dəstək səfəri: “30 günlük şərtsiz atəşkəs” çağırışı
Almaniya, Fransa, Böyük Britaniya və Polşa liderləri Rusiyanı Ukraynada atəşkəsə və danışıqlar masasına çağırmaq üçün bu gün səhər saatlarında Kiyevə səfər ediblər.
Almaniya Kansleri Fridrix Mers, Fransa Prezidenti Emmanuel Makron, Böyük Britaniyanın Baş naziri Kir Starmer və Polşanın Baş naziri Donald Tusk birgə səfərlə Ukrayna paytaxtına çataraq Rusiya ilə münaqişənin həlli üçün yeni təşəbbüs irəli sürüblər.
Crossmedia.az Böyük Britaniya hökumətinin yaydığı açıqlamaya istinadəm xəbər verir ki, Avropalı liderlər ABŞ Prezidenti Donald Trampın Ukraynada sülh sazişi ilə bağlı çağırışını dəstəkləyirlər. Onlar ABŞ ilə birlikdə Rusiyaya “ədalətli və davamlı sülh üçün 30 günlük şərtsiz atəşkəs” təklif ediblər.
Liderlər, eyni zamanda, Rusiya atəşkəsi qəbul etməyənədək Ukraynaya siyasi, hərbi və iqtisadi dəstəklərinin artaraq davam edəcəyini bəyan ediblər.
Fransa Prezidenti Emmanuel Makron Kiyevə çatdıqdan sonra sosial şəbəkədə paylaşdığı mesajlarda ukraynalıların yalnız öz torpaqları üçün deyil, Avropa üçün də mübarizə apardığını vurğulayıb və Rusiyaya qarşı vahid cavab verilməli olduğunu qeyd edib.
Makron, ədalətli və davamlı sülhün yalnız tam və şərtsiz atəşkəslə başlaya biləcəyini, imzalanacaq sülh sazişinin isə Ukraynanın təhlükəsizliyini təmin etməli olduğunu bildirib.
Mədinə Cəlilova
15:20 10.05.2025
Oxunuş sayı: 694
