Hindistan və Pakistan qarşılıqlı hücumlarda bir-birini ittiham edir
Hindistan və Pakistan arasında gərginlik son günlərdə sürətlə artaraq silahlı toqquşmalara çevrilib. Hindistan ötən gecə Pakistan tərəfindən pilotsuz uçuş aparatları və digər silahlarla hücuma məruz qaldığını bildirib. Pakistan isə Hindistan ordusuna məxsus nəzarət məntəqələrini məhv etdiyini açıqlayıb.
Crossmedia.az xarici mediaya istinadən bildirir ki, qarşılıqlı hava hücumları və artilleriya atəşi nəticəsində onlarla hərbçi və mülki şəxs həyatını itirib. Pakistan, Hindistanın çərşənbə günü Pakistan və Pakistanın nəzarətində olan Kəşmir bölgəsinə hava hücumu təşkil etdiyini və cavab olaraq Hindistana zərbələr endirdiyini bildirib. Hindistan isə Pakistanın iddialarını təkzib edib və əksinə, Pakistanın hücumlarını dəf etdiyini bildirib.
Pakistan ordusu Kəşmir sərhədi boyunca 40-50 Hindistan əsgərinin öldürüldüyünü, 29 pilotsuz uçuş aparatının isə məhv edildiyini açıqlayıb. Hindistanın Müdafiə Nazirliyi isə Pakistanın atəşi nəticəsində azı 16 nəfərin həlak olduğunu bildirib. ABŞ-ın yüksək rütbəli rəsmisi Pakistanın Hindistana məxsus bir qırıcı təyyarəni vurduğunu da təsdiqləyib.
İnsidentlər fonunda Hindistanın Cammu şəhərində partlayışlar eşidilib, bölgədə enerji kəsintisi və ciddi panika müşahidə olunub. Kəşmirin Uri şəhərində ağır artilleriya atəşləri, Pəncabın Pathankot bölgəsində isə partlayış xəbərləri yayılıb. Amritsar şəhərində isə sakinlərə evlərindən çıxmamaq tövsiyə olunub.
Bu arada, Hindistanda kommersiya aviaşirkətləri təhlükəsizlik tədbirlərinin artırılması səbəbilə sərnişinlərə hava limanlarına daha tez gəlməyi tövsiyə edib. Eyni zamanda, Hindistanın nəhəng şirkətlərindən biri olan Reliance Industries, “Sindur əməliyyatı” adlı ticarət nişanını yanlışlıqla qeydiyyata alındığını etiraf edərək geri çəkib.
Fatimə Nəbiyeva
11:30 09.05.2025
Oxunuş sayı: 982
