Si Kremldə Putinlə görüşdü: “Çin zorakılığa qarşı Rusiyayla birlikdə işləyəcək”
Çin Xalq Respublikasının Sədri Si Cinpin, Rusiyada 9 mayda qeyd olunacaq “Qələbə Günü” münasibətilə rəsmi səfərlə Moskvaya gedərək Kremlin Sarayında Rusiya Prezidenti Vladimir Putinlə görüşüb.
Crossmedia.az Rusiya mətbuatına istinadən xəbər verir ki, Kremlində keçirilən qarşılanma mərasimində çıxış edən Putin, Si-ni “əziz dostum” sözləri ilə salamlayıb və “Sizinlə birbaşa ünsiyyət qurmaq fürsəti üçün minnətdaram” deyib. O, İkinci Dünya Müharibəsindəki “müqəddəs” qələbənin ildönümü münasibətilə keçiriləcək tədbirdə iştirak üçün Moskvaya gəldiyinə görə Si-yə təşəkkür edib və özü də yaxın gələcəkdə Çinə səfər etməyə hazır olduğunu bildirib.
Si Cinpin isə Putini “köhnə dostum” kimi təqdim edərək dəvət üçün minnətdarlığını ifadə edib. O, Çinin Rusiya ilə birlikdə qlobal güclər olaraq xüsusi məsuliyyət daşıdıqlarını bildirib.
Si, “Çin, bərabər, nizamlı, çoxqütblü və hərtərəfli iqtisadi qloballaşma üçün Rusiya ilə əməkdaşlığa hazırdır” deyib. O, həmçinin vurğulayıb ki, “təktərəfli siyasət və zorakılıqla qarşılaşan Çin, BMT-nin səlahiyyət və nüfuzunu qorumaq üçün Rusiyayla birlikdə işləyəcək”.
Putin, görüş zamanı Rusiya ilə Çin arasında yenilənmiş investisiya sazişi imzalanacağını açıqlayıb. O, Rusiyanın Çin istehsalı avtomobilləri çox sayda idxal etdiyini bildirərək, “Çin texnologiyasının ölkəmizə gətirilməsindən məmnunuq” deyib.
Prezident Putin, görüşlər çərçivəsində bir sıra sənədlərin, o cümlədən yeni investisiya sazişinin imzalanacağını əlavə edib.
Mədinə Cəlilova
19:43 08.05.2025
Oxunuş sayı: 8916
