Türkiyə xarici işlər naziri Varşavada diplomatik görüşlər keçirib
Türkiyənin xarici işlər naziri Hakan Fidan, Avropa İttifaqının qeyri-rəsmi Xarici İşlər Nazirləri Toplantısı (Gymnich) çərçivəsində səfər etdiyi Polşanın paytaxtı Varşavada bir sıra diplomatik görüşlər keçirib.
Crossmedia.az xarici KİV-ə istinadən xəbər verir ki, nazir Fidan, ilk olaraq İsveçin xarici işlər naziri Maria Malmer Stenergard ilə bir araya gəlib. Daha sonra Moldova baş nazirinin müavini və xarici işlər naziri Mihai Popşoi ilə də görüş keçirib.
Görüşlərdən sonra Hakan Fidan, tədbir çərçivəsində təşkil edilən ailə fotosu çəkilişində iştirak edib.
Diplomatik mənbələrə əsasən, Fidan 8 mayda keçirilən toplantı çərçivəsində Aİ-nin Xarici Siyasət və Təhlükəsizlik üzrə Ali Nümayəndəsi Kaja Kallas, eləcə də Aİ üzvü və namizəd ölkələrin xarici işlər nazirləri ilə görüşlər keçirəcək.
Qeyd edək ki, Fidan 2024-cü il avqustun 29-da Brüsseldə Aİ Xarici İşlər Nazirlərinin qeyri-rəsmi toplantısına beş illik fasilədən sonra dəvət alaraq qatılmışdı. Bu dəvət Aİ-nin Türkiyə ilə münasibətləri yenidən canlandırmaq istəyi kimi dəyərləndirilmişdi.
Mədinə Cəlilova
19:30 08.05.2025
Oxunuş sayı: 1399
