Zelenski küçələrə çıxdı: “Ya Rusiya dəyişəcək, ya da dünya”
Ukrayna Prezidenti Volodimir Zelenski İkinci Dünya müharibəsində Nasist Almaniyasının məğlubiyyətinin 80-ci ildönümündə paytaxt Kiyevdə küçələrdə yeriyərək videomesaj yayımlayıb.
Bu günün nasizmə qarşı qələbə günü kimi qeyd edildiyini bildirən Zelenski, həmin müharibədə 8 milyondan çox ukraynalının həlak olduğunu xatırladıb.
Crossmedia.az Ukrayna mətbuatına istinadən xəbər verir ki, Zelenski üç il əvvəl Rusiyanın Ukraynaya qarşı müharibəyə başladığını xatırladaraq, “Təəssüf ki, üç il əvvəl tarix təkrarlandı. O zaman olduğu kimi Kiyev səmasında yenidən hava hücumu siqnalları eşidildi və şər bir daha torpaqlarımıza çökməyə başladı, - deyə vurğulayıb.
Prezident Ukrayna xalqının müharibəyə baxmayaraq ölkəsində yaşamağa davam etdiyini və sülh uğrunda mübarizə apardığını vurğulayıb: “Hər birimiz sülhün bərqərar olmasını istəyirik. Biz bunun üçün mübarizə aparırıq”.
Zelenski bu mübarizənin nəyə ehtiyacı olduğunu bildiklərini deyərək, “Ya Rusiya kökündən dəyişməli olacaq, ya da dünya dəyişəcək”, ifadəsini işlədib.
O, 80 il əvvəl olduğu kimi bu gün də dünyanın “şərə” qarşı birləşməli olduğunu qeyd edib və əlavə edib: “Dünya Rusiyanın nasistlərdən azad edilməsi və silahsızlaşdırılması prosesini həyata keçirməyə məcbur olacaq”.
Zelenski mesajının sonunda “Hər bir işğalçı gec-tez torpaqlarımızı tərk edəcək. Həyat həmişə geri qayıdacaq”, - deyə bildirib.
Mədinə Cəlilova
19:17 08.05.2025
Oxunuş sayı: 10705
