Qardaş ölkədə olmaq doğmalıq hissidir — Özbəkistanlı dosent Bakıda təhsil əməkdaşlığından danışdı
"İngla School Baku"nun təşkilatçılığında Bakıda keçirilən beynəlxalq təhsil sərgisi təkcə universitetlərarası əməkdaşlıqların genişlənməsi üçün deyil, eyni zamanda Azərbaycanla Özbəkistan arasında təhsil sahəsindəki potensial əlaqələrin araşdırılması baxımından da önəmli platforma olub. Sərgidə iştirak edən və bir sıra yerli universitetlərdə görüşlər keçirən Özbəkistanlı dosent İxtiyor Yoqubov bu səfərin ona yeni perspektivlər qazandırdığını deyir.
Özbəkistan-Finlandiya Pedeqoji İnstutunda dosent olan Yoqubov, Azərbaycana ilk dəfə səfər etdiyini bildirərək qeyd edib ki, gördükləri onu həm təəccübləndirib, həm də ruhlandırıb. “Burada gördüyüm infrastruktur, ali təhsilə olan yanaşma və ümumiyyətlə, insanlarda təhsilə qarşı hörmət məni çox sevindirdi. Mən özümü burda yad ölkədə yox, qardaş bir diyarda hiss etdim,” – deyə o vurğulayıb.
Dosentin sözlərinə görə, Azərbaycanla Özbəkistan arasında təhsil sahəsində daha dərin və sistemli əməkdaşlığa böyük ehtiyac var. Xüsusilə məktəbəqədər və ümumi təhsil sahəsində Azərbaycanın son illərdə tətbiq etdiyi yanaşmaların Özbəkistan üçün maraqlı nümunə ola biləcəyini düşünür. “Azərbaycanda məktəbəqədər təhsil sisteminin təşkili kifayət qədər sistemlidir. Biz bu təcrübədən faydalana bilərik,” – deyə Yoqubov əlavə edib.
Səfər çərçivəsində Bakı Dövlət Universiteti, Azərbaycan Dövlət Pedaqoji Universiteti və Azərbaycan Dillər Universitetini ziyarət edən dosent bildirib ki, bu görüşlər zamanı gələcəkdə birgə elmi layihələr, tələbə və müəllim mübadiləsi, eləcə də ortaq konfransların keçirilməsi kimi ideyalar müzakirə olunub. Hələ rəsmi razılaşmalar əldə olunmasa da, hər iki tərəfdə əməkdaşlığa dair marağın olduğu hiss olunub.
İxtiyor Yoqubov xüsusilə Azərbaycan Dillər Universitetində Özbək dili və mədəniyyətinə dair mərkəzin yaradılması təşəbbüsünü yüksək qiymətləndirib. Onun fikrincə, bu cür təşəbbüslər təkcə elmi əməkdaşlığa yox, həm də xalqlar arasında mədəni yaxınlaşmaya xidmət edir. “Mədəniyyət vasitəsilə bir-birimizi daha yaxşı anlaya bilərik. Dillərimiz və köklərimiz bir-birinə o qədər yaxındır ki, bunu daha da dərinləşdirmək yalnız xeyir gətirə bilər,” – deyə dosent bildirib.
Sonda Yoqubov qeyd edib ki, bu cür tədbirlərin Özbəkistanda da təşkil olunması gələcəkdə iki ölkə arasında daha geniş miqyaslı təhsil və elmi əməkdaşlıqlar üçün zəmin yarada bilər. O, həm “Ingla School Baku”ya, həm də sərginin təşkilinə dəstək göstərən hər iki ölkənin təhsil qurumlarına təşəkkür edib.
Qeyd edək ki, mayın 3-də İngla School Baku-nun təşkilatçılığı ilə AMEA Mərkəzi Elmi Kitabxanasında Özbəkistan universitetlərinin sərgisi keçirilib. Tədbirin tərəfdaşları Özbəkistan Ali Təhsil Nazirliyi, Özbəkistanın Azərbaycandakı Səfirliyi, AMEA Mərkəzi Elmi Kitabxanası (MEK), Crossmedia.az Analitik informasiya Portalı idi.
Qardaş Özbəkistanın 15-ə qədər nüfuzlu universitetlərindən – STARS Beynəlxalq Universiteti, Jurnalistika və Kütləvi kommunikasiya Universiteti, Milli Tədqiqatlar Universiteti “Daşkənd İrreqasiya və Aqrotexnika Avtomatlaşdırma İnstitutu”, Özbəkistan-Finlandiya Pedaqogika Universiteti, Səmərqənd Dövlət Xarici Dillər Universiteti, Buxara Dövlət Universiteti, Əbu Əli İbni Sina adına Buxara Dövlət Tibb İnstitutu, İslam Kərimov adına Daşkənd Dövlət Texniki Universiteti, Daşkənd Tibb Akademiyası, Vebster Universiteti (Daşkənd), Turin Politexnik Universiteti Daşkənd Filialı, Kokand Pedaqoji Universiteti, Daşkənd Əczaçılıq Universiteti, Daşkənd Dövlət İqtisadiyyat Universiteti olmaqla 40-dan çox nümayəndə sərgiyə qatılıb.
Emil Nağızadə
14:08 03.05.2025
Oxunuş sayı: 1830
