Türkiyə “Üç Dəniz Təşəbbüsü”nün strateji tərəfdaşı oldu
Türkiyə Baltik, Adriatik və Qara dənizləri əhatə edən “Üç Dəniz Təşəbbüsü”nün (Three Seas Initiative) strateji tərəfdaşı elan olunub. Bu təşəbbüs Avropanın mərkəzi və şərq hissəsində yerləşən ölkələr arasında əməkdaşlığı gücləndirməyə, infrastruktur, enerji və nəqliyyat sahələrində inteqrasiyanı artırmağa yönəlib.
Layihənin əsas məqsədi Baltik dənizinin Litvadakı Klaypeda limanından başlayaraq Polşa, Slovakiya, Macarıstan, Rumıniya və Bolqarıstan üzərindən keçərək Türkiyəyə qədər uzanan şimal-cənub dəhlizi yaratmaqdır. Bu dəhliz regionda iqtisadi əlaqələri gücləndirməklə yanaşı, enerji təhlükəsizliyinin təmin olunmasına da töhfə verəcək.
Crossmedia.az xarici mediaya istinadən bildirir ki, “Üç Dəniz Təşəbbüsü” ilk dəfə 2015-ci ildə Polşa və Xorvatiyanın təşəbbüsü ilə yaradılıb. Layihə Avropa İttifaqının (Aİ) dəstəyi ilə həyata keçirilir və əsas hədəfi Avropanın şimal və cənub regionları arasında infrastruktur əlaqələrinin gücləndirilməsidir. Təşəbbüsə bu günə qədər 13 ölkə qoşulub.
Türkiyənin bu layihəyə daxil olması həm geosiyasi, həm də iqtisadi baxımdan mühüm əhəmiyyət daşıyır. Rəsmi Ankara bu təşəbbüs vasitəsilə həm Avropa ilə ticarət əlaqələrini gücləndirəcək, həm də regionda logistik qovşaqlardan birinə çevriləcək. Layihə Türkiyənin Avropa ilə daha sıx enerji və nəqliyyat əməkdaşlığına yol açacaq.
“Via Carpatia” avtomobil magistralı vasitəsilə Yaxın Şərqdən Avropaya uzanan ticarət yolları Türkiyə üzərindən keçəcək. Bu da Ankaraya regionun əsas tranzit mərkəzlərindən biri olmaq imkanı verəcək. Yeni nəqliyyat və enerji dəhlizləri Avropa bazarlarını daha əlçatan edəcək və Türkiyənin beynəlxalq arenadakı rolunu daha da gücləndirəcək.
Fatimə Nəbiyeva
08:55 30.04.2025
Oxunuş sayı: 763
