HƏMAS rəsmisindən “5 illik atəşkəs” açıqlaması
İsrailin Qəzza zolağına hücumları davam edərkən, bir HƏMAS rəsmisi Fransız mətbuatına açıqlamasında beş illik atəşkəs və əsirlərin bir dəfəlik azad edilməsi ilə bağlı razılaşmaya açıq olduqlarını bildirib.
Crossmedia.az xarici mediaya istinadən xəbər verir ki, adının gizli saxlanılması şərtilə AFP agentliyinə danışan HƏMAS rəsmisi, “HƏMAS Qəzzadakı müharibəni dayandırmaq üçün bütün əsirlərin bir dəfəlik azad olunmasına və beş illik atəşkəsə razıdır” deyib. Bu açıqlama, HƏMAS nümayəndə heyətinin bu gün Qahirədə vasitəçi ölkələrlə görüşü öncəsi yayımlanıb.
17 aprel tarixində HƏMAS, 10 diri əsirə qarşılıq 45 günlük atəşkəs təklifini İsrailin irəli sürdüyü şərtlərə görə rədd etmişdi. HƏMAS müharibənin tam dayandırılmasını, İsrail ordusunun Qəzzadan tam çəkilməsini, əsir mübadiləsini və humanitar yardımların dərhal təmin edilməsini tələb edir. İsrail isə bütün əsirlərin azad olunmasını və HƏMAS da daxil olmaqla silahlı qrupların tərksilah edilməsini istəyir.
İsrail ordusunun Qəzza zolağının müxtəlif bölgələrinə hücumları nəticəsində 17 fələstinlinin həyatını itirdiyi bildirilib. Yerli mənbələrə görə, İsrail ordusu Qəzzanın cənubundakı Sabra məhəlləsində Hur ailəsinin evini bombalayıb, nəticədə evdə olan 10 nəfər ölüb. Dağıntılar altında çox sayda insanın qaldığı qeyd olunub.
Bundan başqa, Şati qaçqın düşərgəsində Əbu Abdu ailəsinə məxsus evə hücum nəticəsində 3, Beyt Lahiyə və Şucaiyyə bölgələrindəki hücumlarda isə 4 nəfər həyatını itirib. İsrail artilleriyası da Qəzzanın şərq hissələri və Rəfahın qərb bölgələrini intensiv atəşə tutub.
Mədinə Cəlilova
11:18 27.04.2025
Oxunuş sayı: 8453
