Hindistandan mediaya xəbərdarlıq: Əməliyyatları canlı yayımlamayın
Hindistanın İnformasiya və Yayım nazirliyi milli təhlükəsizlik məqsədilə media qurumlarına və sosial media istifadəçilərinə müdafiə əməliyyatları barədə canlı yayımdan və həssas məlumatların paylaşılmasından çəkinməyi tövsiyə edib.
Crossmedia.az Nazirliyin rəsmi “X” hesabında yayımlanan açıqlamaya istinadən xəbər verir ki, bütün media platformalarından, xəbər agentliklərindən və sosial media istifadəçilərindən müdafiə və təhlükəsizliklə bağlı əməliyyatlar barədə xəbər yayarkən maksimum məsuliyyət göstərmələri istənilib.
Açıqlamada mövcud qanun və qaydalara əməl olunmasının vacibliyi vurğulanıb, xüsusilə əməliyyatların canlı yayımlanmaması və vizual materialların paylaşılmaması tələb olunub.
Nazirlik xəbərdarlıq edib ki, həssas məlumatların vaxtından əvvəl açıqlanması düşmən qüvvələrə kömək edə, əməliyyatların effektivliyini və şəxsi heyətin təhlükəsizliyini risk altına ata bilər.
Bundan əvvəl nazirlik bütün televiziya kanallarına “təhlükəsizlik qüvvələrinin həyata keçirdiyi antiterror əməliyyatlarının canlı yayımlanmamasına” dair tövsiyə vermişdi. Açıqlamada bu cür əməliyyatlar başa çatana qədər yayımların yalnız hökumət tərəfindən təyin olunmuş rəsmi nümayəndənin verdiyi brifinqlərlə məhdudlaşdırılması istənilib.
Mədinə Cəlilova
13:00 27.04.2025
Oxunuş sayı: 8142
