ABŞ-nin hədəf aldığı limanda neft sızması: Qırmızı dənizdə ekoloji fəlakət riski
Husilər, ABŞ-nin Yəmənin Hudeydə şəhərindəki Ras İsa limanına hücumları nəticəsində Qırmızı dənizə böyük həcmdə neft sızdığını bildirib.
Crossmedia.az xarici mediaya istinadən xəbər verir ki, Husilərə bağlı hökumətin xarici işlər naziri Cəmal Amir BMT rəhbərliyinə göndərdiyi məktubda ABŞ-nin limandakı mülki infrastrukturu məhv etdiyini və bunun ekoloji fəlakət riski yaratdığını vurğulayıb. Nazir sızmanın dəniz ekosistemini, mərcan riflərini və balıqçılıq mənbələrini təhdid etdiyini qeyd edib.
Cəmal Amir ABŞ-nin hücumlarını “müharibə cinayəti” adlandırıb və beynəlxalq məsuliyyətin Vaşinqtonun üzərində olduğunu bildirib.
Hudeydə sahilində yerləşən Ras İsa limanı 1980-ci illərdə Yəmənin ilk xam neft ixrac limanı kimi fəaliyyətə başlayıb. 17 aprel tarixində ABŞ-nin hava hücumları nəticəsində limanda ağır dağıntılar baş verib, 74 nəfər ölüb, 171 nəfər yaralanıb.
Martın 15-dən sonra ABŞ-nin Yəməndəki hücumlarında 217 nəfərin öldüyü, 436 nəfərin isə yaralandığı bildirilir.
Mədinə Cəlilova
12:00 27.04.2025
Oxunuş sayı: 9512
