İranda partlayışdan sonra fövqəladə vəziyyət elan edilib
İranın Səhiyyə Nazirliyi Şəhid Rəcai limanında baş verən partlayışdan sonra Bəndər Abbas şəhərində ictimai səhiyyə sahəsində fövqəladə vəziyyət elan edib.
Crossmedia.az İran mətbuatına istinadən xəbər verir ki, nazirlik ammiak, kükürd dioksidi və azot dioksidi də daxil olmaqla təhlükəli çirkləndiricilərin yayılması barədə xəbərdarlıq yayıb. Fövqəladə hallara cavab qruplarının yaradılması tapşırılıb.
Sakinlərə evdə qalmaq, açıq fəaliyyətlərdən çəkinmək və pəncərələri bağlı saxlamaq tövsiyə olunub. Tənəffüs və ürək xəstəlikləri olanlara, uşaqlara, hamilə qadınlara və yaşlılara N95 və ya P2 maskalarından istifadə etmələri məsləhət görülüb.
Bundan əlavə, səlahiyyətlilər tez-tez üz yumağı və qoruyucu geyimlərdən istifadə etməyi tövsiyə ediblər.
Qeyd edək ki, partlayış nəticəsində azı 8 nəfər ölüb, 750-dən çox insan yaralanıb. Hadisənin səbəbi kimi limanda saxlanılan təhlükəli kimyəvi maddələrin, o cümlədən raket yanacağı üçün istifadə olunan natrium perxloratın düzgün saxlanılmaması göstərilir. Hazırda partlayışla bağlı araşdırma aparılır.
Liman ərazisində yanğın hələ də tam söndürülməyib və alovun intensivliyi artıb.
Mədinə Cəlilova
10:11 27.04.2025
Oxunuş sayı: 945
