Xarici xəbərlər

İraqdan Suriyaya 250 min tonluq buğda yardımı

İraq ticarət nazirliyi Bağdad hökumətinin Suriyaya yardım məqsədilə 250 min ton buğda göndərdiyini açıqlayıb. Yardımın, İraq Nazirlər Kabinetinin əvvəlcədən qəbul etdiyi qərar çərçivəsində həyata keçirildiyi bildirilib. Buğdaların İraq nəqliyyat nazirliyinə bağlı Quru Nəqliyyat Ümumi Şirkətinin yük maşınları ilə Suriya sərhədindən keçid etdiyi qeyd olunub.

Crossmedia.az Suriya mətbuatına istinadən xəbər verir ki, Suriyanın Deyr əz-Zor vilayətinin Daxili Ticarət Müdiri Xəlil Salih, İraq hökumətinin göndərdiyi buğda yardımının ilk partiyasının bölgəyə çatdığını və bölgələrin ehtiyacına uyğun şəkildə paylanmağa başlandığını bildirib. Salih, Suriya rəsmi xəbər agentliyi SANA-ya açıqlamasında, “İraq hökumətinin göndərdiyi buğda yardımı Deyr əz-Zordan digər vilayətlərə daşınır və ehtiyaca görə bölgələrə paylanacaq,” deyə qeyd edib.

Digər tərəfdən, İraq hökumətinin sözçüsü Basim əl-Avadi, İraq heyətinin Suriyada keçirdiyi görüşlərlə bağlı açıqlamasında, son səfərin əvvəlki razılaşmaların icrası baxımından mühüm addım olduğunu bildirib. El-Avadi, İraq və Suriya arasında münasibətlərin nəzəri mərhələdən praktik mərhələyə keçdiyini vurğulayıb.

İraq hökumət sözçüsü bildirib ki, səfər yalnız təhlükəsizlik sahəsini deyil, iqtisadiyyat və ticarət sahələrində də əməkdaşlığı artırmağı hədəfləyir: “Bu görüşlər İraq və Suriyanın keçmişin mənfi təcrübələrini geridə qoyaraq daha güclü və effektiv tərəfdaşlıq qurmaq istiqamətində atdığı ciddi addımların başlanğıcıdır”.

Mədinə Cəlilova

🖨 Çap et

09:45 27.04.2025

Oxunuş sayı: 979