Yalçın Rəfiyev: COP29 Prezidentliyi Tərəflər Konfransının səmərəliliyini artırmaqdan çox prosesi qorumağı təşviq edir
COP29 Prezidentliyi Tərəflər Konfransının səmərəliliyini artırmaq və ya gücləndirməkdən daha çox prosesin özünü qorumağı təşviq edir.
Crossmedia.az xəbər verir ki, bu barədə Azərbaycan xarici işlər nazirinin müavini, COP29-un baş danışıqçısı Yalçın Rəfiyev aprelin 26-da Xankəndidə keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının Simulyasiya Konfransında danışıb.
Onun sözlərinə görə, hazırda xarici çağırışları nəzərə alaraq prosesi və prosesin irsini qorumaq olduqca vacibdir.
Baş danışıqçı COP29-da qarşıya çıxan əsas problem və əldə olunan nailiyyətlərdən də söz açıb. Y.Rəfiyev bildirib ki, maliyyə məsələsinə gəldikdə dünya iki hissəyə - inkişaf etmiş və inkişaf etməkdə olan ölkələrə ayrılır:
“Maliyyə bir çox şeylər üçün kritik vasitədir. İqlim danışıqlarında, beynəlxalq iqlim sahəsində, iqlim cəmiyyətində maliyyə olmadan iqlim üçün öz ambisiyalarınıza çata, emissiyaları azalda, dəyişən iqlimə uyğunlaşa və infrastrukturunuzu inkişaf edən reallıqlara uyğunlaşdıra bilməzsiniz. Ona görə də COP29-dan inkişaf etməkdə olan dünya üçün müəyyən bir maliyyə rəqəmini təmin etməsi gözlənilirdi”.
Nazir müavini vurğulayıb ki, COP29-a qədər iqlim dəyişikliyi ilə mübarizədə inkişaf etməkdə olan ölkələrə ayrılan vəsaitin məbləği 100 milyard dollar təşkil edirdi:
“Bu isə 2009-cu ildə Kopenhagendə prosesin sonunda gələn deklarativ bir rəqəm idi. Bakı COP-unda isə biz məbləğin 2035-ci ilədək azı 300 milyard dollara qədər yüksəldilməsi üzrə razılığa gəldik, yəni irəliyə doğru mühüm razılaşmalara nail olundu. Ancaq qeyd edim ki, 300 milyard yalnız dövlət mənbələrindən ayrılmalı olan vəsaitdir".
16:33 26.04.2025
Oxunuş sayı: 11971
