Estoniya müdafiə xərclərini 5,4 faizə çatdıracaq
Estoniya hökuməti Baltikyanı ölkənin müdafiə xərclərini ÜDM-in 5,4 faizinə çatdırmaq üçün əlavə maliyyələşdirməni təsdiqləyib.
Crossmedia.az xarici mediaya istinadən bildirir ki, Estoniya dörd illik dövrdə 2,8 milyard avro əlavə vəsait ayıracaq. Müdafiə naziri Hanno Pevkur bunun ölkənin milli təhlükəsizliyi üçün tarixi qərar olduğunu vurğulayıb.
Yeni maliyyələşdirmə Estoniya Müdafiə Qüvvələrinin texnika, sursat və hərbi qabiliyyət baxımından güclənməsini təmin edəcək. Plan çərçivəsində hava hücumundan müdafiə sistemləri, rabitə şəbəkələri və uzaqmənzilli hücum imkanları genişləndiriləcək.
Estoniya Silahlı Qüvvələrinin rəhbəri Andrus Merilo bu addımı Rusiyanın Ukraynaya müdaxiləsindən sonra təhlükəsizlik mühitinin pisləşməsi ilə əlaqələndirib. O bildirib ki, Estoniya yalnız müdafiə səviyyəsini qorumaqla kifayətlənməyəcək, həm də potensialı artıracaq.
Yeni müdafiə planları NATO-nun iyunda keçiriləcək sammiti öncəsi hazırlanıb və ABŞ prezidenti Donald Trampın NATO ölkələrinin müdafiə xərclərini artırmaları ilə bağlı tələbləri fonunda baş verib.
Zəhra Ağayeva
14:00 26.04.2025
Oxunuş sayı: 1120
