2025-ci ildə Avropada ən sərfəli əmlak yatırımı ölkələri açıqlandı
2025-ci ildə Avropada ən sərfəli əmlak yatırımı üçün ən uyğun ölkələr Orta və Şərqi Avropada yerləşir. Siyahıya Moldova liderlik edir.
İngiltərənin sığorta şirkəti William Russell-in araşdırmasına əsasən, Moldova Avropada ən yaxşı əmlak yatırımı üçün ən yüksək xalı toplayıb.
Crossmedia.az xarici mediaya istinadən bildirir ki, araşdırmada əmlak vergisi dərəcələri, kirayə gəlirlərindən tutulan gəlir vergisi və ümumi kirayə gəlirliliyi kimi əsas göstəricilər incələnib. Daha əvvəl İngiltərənin köç şirkəti 1st Move International tərəfindən keçirilən araşdırmada Litva ilk sırada yer almışdı. Hazırkı siyahıda isə Litva ikinci yerdə qərarlaşıb, ardınca Şimali Makedoniya gəlir.
Tədqiqatda Moldovanın mülkiyyət alma xərclərinin cəmi qiymətin 2,80%-i qədər olduğu və kirayə gəlirlərinə tətbiq olunan gəlir vergisinin 12% olduğu vurğulanır. Eyni zamanda yüksək kirayə gəliri təmin etdiyi qeyd edilir. Moldova, “erkən və riski sevən investorlar üçün inkişafda olan, yüksək gəlirli bir bazar” kimi xarakterizə olunub. Bu nəticəyə ölkənin paytaxtı Kişinev şəhərində infrastrukturun, turizmin və biznes sahələrinin sürətli inkişafı təsir edib.
Moldovanın Avropa İttifaqına hələ üzv olmadığı, lakin namizəd ölkə statusunda olduğu da qeyd edilib.
Litva, 2025-ci ildə əmlak yatırımı üçün ən yaxşı ikinci ölkə hesab edilir. Eurostat-ın məlumatına görə, 2024-cü ilin son üç ayında Litvada əmlak qiymətləri ötən ilin eyni dövrü ilə müqayisədə təxminən 10% artıb. Ölkədə əmlak bazarındakı sürətli artım və əcnəbilərə qarşı hər hansı mülkiyyət məhdudiyyətinin olmaması investisiya üçün cəlbedici şərait yaradır. 2015-ci illə müqayisədə Litvada kirayə qiymətləri 170%-dən çox artıb.
Fatimə Nəbiyeva
12:50 26.04.2025
Oxunuş sayı: 1055
