Tramp FED sədrini sərt tənqid etdi
ABŞ prezidenti Donald Tramp cümə axşamı Federal Ehtiyat Sistemi (FED) sədri Cerom Pauellə qarşı tənqidlərini daha da gücləndirib. Tramp onun vəzifədən uzaqlaşdırılmasının vaxtının çoxdan çatdığını bildirib. Bu açıqlama Pauellin Trampın tarif siyasətinin iqtisadiyyata təsirləri ilə bağlı verdiyi xəbərdarlıqdan bir gün sonraya təsadüf edir.
Crossmedia.az xarici mediaya istinadən bildirir ki, Tramp sosial şəbəkə paylaşımında FED rəhbərini faiz dərəcələrini endirmədiyinə görə tənqid edib və ABŞ Mərkəzi Bankının Avropa ilə müqayisədə geri qaldığını deyib. “FED-dən Cerom Pauell həmişə ÇOX GEC və SƏHV qərar verir. Dünənki hesabat da eyni dərəcədə qarışıq və uğursuz idi. Onun vəzifədən uzaqlaşdırılması çox tez baş verməlidir”, – Tramp yazıb.
Cerom Pauell çərşənbə günü bildirib ki, Tramp administrasiyasının tarif siyasəti gözləniləndən daha geniş miqyasda dəyişikliklər yaradıb. Onun sözlərinə görə, bu dəyişikliklər ABŞ iqtisadiyyatını “stagflyasiya” (inflyasiya və iqtisadi durğunluğun birlikdə baş verdiyi hal) ilə qarşı-qarşıya qoyur.
FED-in digər rəsmiləri də son həftələrdə oxşar fikirlər səsləndiriblər. Onlar bildirirlər ki, tariflər inflyasiyanı və işsizliyi artıracaq. Milyarder Rey Dalio isə vəziyyəti daha da sərt dəyərləndirərək ABŞ iqtisadiyyatının artıq tənəzzülə girə biləcəyini deyib.
Qeyd edək ki, Cerom Pauell FED sədri vəzifəsinə ilk dəfə 2018-ci ildə Tramp tərəfindən təyin olunub. 2021-ci ildə isə prezident Co Bayden onun müddətini uzadıb. Pauellin hazırkı səlahiyyət müddəti 2026-cı ilin mayında başa çatır.
Fatimə Nəbiyeva
16:40 17.04.2025
Oxunuş sayı: 5343
