Mixail Qusman: Ermənistanın konstitusiyasının indiki şəkildə saxlanılması Bakı və İrəvan arasında sülh sazişinin bağlanmasını qeyri-mümkün edəcək
Bakı və İrəvan arasında sülh sazişinin bağlanması Ermənistan konstitusiyasında Azərbaycana qarşı ərazi iddialarını ehtiva edən müddəalar qaldığı müddətdə mümkün deyil.
Crossmedia.az "Report" istinadən xəbər verir ki, bunu Antalya Diplomatiya Forumunun kuluarlarında jurnalistlərə TASS-ın baş direktorunun birinci müavini Mixail Qusman deyib.
Onun sözlərinə görə, ölkələr arasında sülh sazişinin mətni üzrə danışıqların başa çatması "şübhəsiz ki, müsbət addımdır", lakin bunu sülh prosesinin tamamlanması kimi qəbul etmək hələ tezdir.
"Bir tərəfdən, sazişin mətninin razılaşdırılmasına sevinməliyik. Kənardan baxanda elə görünə bilər ki, təkcə sənədin imzalanması qalıb. Lakin Azərbaycan Prezidenti İlham Əliyevin ADA universitetində keçirilən forumda çıxışı zamanı vurğuladığı kimi, prinsipial əhəmiyyət kəsb edən vacib məqamlar qalır. Xüsusilə hamıya məlumdur ki, Ermənistan konstitusiyası da daxil olmaqla bir sıra sənədlərdə hələ də mahiyyətcə Azərbaycana qarşı ərazi iddialarını əks etdirən müddəalar qalmaqdadır. Buna görə də digər ölkənin əsas qanununda belə formulların təsbit olunduğu bir halda sülh sazişinin imzalanması mümkün deyil", - M.Qusman vurğulayıb.
O əlavə edib ki, bu müddəaların Ermənistan Konstitusiyasında saxlanılacağı təqdirdə sazişin imzalanması gələcəkdə ciddi risklərə səbəb ola bilər:
"Əgər Ermənistan Konstitusiyası ilə bağlı məsələ (Azərbaycana qarşı ərazi iddialarının aradan qaldırılması üçün sənədə müvafiq dəyişikliklərin edilməsi) həll olunmasa, bu, belə vacib sənədin (sülh sazişi) altına gec partlayan mina qoymağa bərabər olacaq".
Qeyd edək ki, Azərbaycan XİN martın 13-də Ermənistanla 17 maddədən ibarət sülh sazişinin mətninin razılaşdırılması üzrə danışıqların başa çatdığını bəyan edib.
20:16 11.04.2025
Oxunuş sayı: 1274
