Türk Dövlətlərinə xəyanət! - Arxadan vurulan zərbə!
Son zamanlar Qazaxıstan, Özbəkistan və Türkmənistanın Avropa İttifaqı (Aİ) ilə əməkdaşlıq çərçivəsində Cənubi Kiprin müstəqilliyini tanıması və bu istiqamətdə addımlar atması türk dünyasında geniş müzakirələrə səbəb olub. Bu ölkələr Cənubi Kipri dövlət olaraq tanımaqla yanaşı, Yunan Kiprində səfirlik açmağa da qərar veriblər. Bu cür addımlar türk dünyası sevdalılarını məyus etməklə yanaşı, bu ideyaya qarşı olanları sevindirmişdir. Bu məsələnin necə qiymətləndirildiyini və bu addımların Türk dövlətlərinin birliyinə təsirini başa düşmək üçün, Mərkəzi Asiya və Türküstan coğrafiyasındakı Türk dövlətlərinin bu yeni siyasətə necə yanaşdığı barədə fikir bildirilməsi əhəmiyyətlidir.
Bu barədə Crossmedia.az-a danışan Milli Məclisin deputatı Tənzilə Rüstəmxanlı qeyd edib ki, bu, Türk dünyasının birliyinə böyük bir xəyanətdir.
O, bu məsələnin neçə gündür gündəmdə olduğunu qeyd edib: "Qazaxıstan, Özbəkistan Orta Asiyanın ən böyük dövlətlərindəndir.
Onların Aİ ilə əməkdaşlığı çox önəmlidir. Amma əgər, həqiqətən də, Aİ ilə əməkdaşlıq bu qədər vacibdirsə, onda Cənubi Kipri, Cənubi Rum Kəsimini tanımaq şərti qarşılığında Şimali Kipri də tanımalı idilər. Rumu tanıdıqları kimi Türk Cümhuriyyətini də tanısaydılar, bunun bir adı olardı".
T.Rüstəmxanlı bunun yalnız indi bir adı olduğunu, onun da Türk birliyinə, Türk Dövlətlər Təşkilatına, o cümlədən də türk millətinə ən böyük xəyanət olduğunu qeyd edib: "Digər türk topluluqları da, türk dövlətləri də buna ciddi təpki göstərməlidir. Millət olaraq da təpki göstərməliyik. Əlbəttə, onların xarici siyasətlərində müstəqildirlər. Necə istəyirsə, elə hərəkət edə bilər. Amma əgər Avropa ilə əməkdaşlıq bu qədər önəmlidirsə, onda türk dövlətlərinin maraqları da nəzərə alınmalı idi. Hazırkı hadisə isə Türk dövlətlərinə çox böyük xəyal qırıqlığı yaşatdı. Yəqin ki, bu mövzu müzakirə olunacaq. Ciddi şəkildə nəticəsinin yaxın günlərdə görəcəyimizi ehtimal edirəm. Çünki Türk Dövlətləri Təşkilatının gələcəyini təhlükəyə atacaq bir addımdır".
Fatimə Məmmədova
14:39 08.04.2025
Oxunuş sayı: 18588
