“Skoda” şirkəti ADY və Bakı Metropoliteninə investisiyalarla modernləşdirmə təklif edir
Çexiyanın aparıcı avtomobil istehsalçısı olan “Skoda” şirkəti “Azərbaycan Dəmir Yolları” QSC və Bakı Metropoliteninə minimal investisiyalarla nəqliyyat sistemlərinin modernləşdirilməsi üzrə təkliflər irəli sürmək niyyətindədir.
Crossmedia.az xəbər verir ki, bunu “Skoda Group”un Mərkəzi Asiya və Cənubi Qafqaz üzrə satış üzrə vitse-prezidenti Roman Sorkin Bakıda keçirilən “Daha ‘yaşıl’ gələcəyə doğru innovativ yollar: Bərpa olunan enerji və emissiyaların azaldılması” mövzusunda tədbirdə çıxışı zamanı bildirib.
Onun sözlərinə görə, ictimai nəqliyyat sistemləri sosial infrastrukturun əsasını təşkil edir və bu baxımdan “Skoda”nın məqsədi Azərbaycanı yeni enerji həllərinə keçidə təşviq etmək, bu prosesi isə davamlı şəkildə həyata keçirməkdir.
“Hazırda Azərbaycanda iki əsas təşəbbüsümüz var: birincisi, Bakı Metropoliteninin modernləşdirilməsi, ikincisi isə şəhərətrafı dəmir yolu əlaqələri üçün hərəkət tərkibinin inkişafıdır. Dekarbonizasiya insanların avtomobildən daha dayanıqlı nəqliyyat vasitələrinə, o cümlədən şəhərətrafı elektrik qatarlarına keçidi ilə birbaşa bağlıdır. Lakin müşahidə edirik ki, “Azərbaycan Dəmir Yolları” hələ də dizel qatarları alır. Halbuki bizim artıq tam sınaqdan çıxmış və etibarlı akkumulyator texnologiyalarımız mövcuddur”, - deyə şirkətin vitse-prezidenti vurğulayıb.
R. Sorkin qeyd edib ki, “Skoda” şirkətinin Bakı Metropoliteni üçün də irimiqyaslı investisiyalar tələb etməyən hazır texnoloji həlləri mövcuddur:
“Baltikyanı ölkələrdə belə, razılaşmaların olmaması və infrastruktur məhdudiyyətləri səbəbindən regenerativ əyləcləmə ilə əldə olunan enerjinin şəbəkəyə qaytarılması mümkün deyildi. Buna baxmayaraq, biz hərəkət tərkibində ‘superkondensator’ texnologiyasını tətbiq etmişik. Bu texnologiya əyləcləmə zamanı yaranan enerjidən daxili ehtiyaclar – işıqlandırma, isitmə və digər funksiyalar üçün istifadə etməyə imkan verir”.
Onun sözlərinə görə, “Skoda” analoji metro sistemlərində kompleks yanaşma nəticəsində 30 %-ə qədər enerji qənaətinə nail olub:
“Kompleks yanaşma bu prosesin əsasını təşkil edir. Azərbaycanda biz nəqliyyat operatorları ilə əməkdaşlıqda yalnız hərəkət tərkibinin alınmasını deyil, həm də sistemli həllərin hazırlanması və tətbiqini hədəfləyirik. Bu, sadəcə qatarların tədarükü deyil, bütöv bir layihədir. Addım-addım işləməklə biz həm əhəmiyyətsiz infrastruktur xərclərinin qarşısını ala, həm də ciddi enerji qənaətinə nail ola bilərik”.
16:10 07.04.2025
Oxunuş sayı: 1013
