Bolnisidə həftəsonu məktəbi açılıb
Diasporla İş üzrə Dövlət Komitəsinin dəstəyi və layihələri çərçivəsində Kvemo Kartli bölgəsinin Bolnisi rayonunda fəaliyyət göstərən “Təhsil və Gənclər Birliyi”nin nəzdində həftəsonu məktəbi açılıb.
Crossmedia.az komitəyə istinadən xəbər verir ki, Gürcüstanın Kvemo Bolnisi (Kəpənəkçi) kəndində açılan məktəb bölgədə yaşayan soydaşlarımız üçün nəzərdə tutulub.
Bildirilib ki, həftəsonu məktəbinin məqsədi azərbaycanlı uşaqlarda tariximizə, mədəniyyətimizə və incəsənətimizə maraq oyatmaq, onların əsl şəxsiyyət kimi boya-başa çatmasına xidmət etmək, Azərbaycan dilini qoruyub yaşatmaqdır.
Məktəbin Azərbaycan dili müəllimi Çingizxan Yaqubov Kəpənəkçi kəndinin bu günə qədər Azərbaycan elminə və mədəniyyətinə görkəmli şəxsiyyətlər bəxş etdiyini bildirib. O, bu ənənənin davam etdirilməsində maraqlı olduqlarını vurğulayıb.
Qeyd edək ki, son illərdə Gürcüstanın müxtəlif bölgələrində həftəsonu məktəbləri fəaliyyətə başlayıb.
15:48 04.04.2025
Oxunuş sayı: 8078
