4-cü Azərbaycan-Belarus beynəlxalq qrant müsabiqəsinin nəticələri açıqlanıb
Azərbaycan Elm Fondu Azərbaycan və Belarus alimlərindən ibarət müvəqqəti yaradılmış yaradıcı kollektivlərin birgə yerinə yetirilməsi planlaşdırılan və hər iki tərəf üçün aktual olan elmi istiqamətlər üzrə elmi-tədqiqat layihələrini dəstəkləmək, beynəlxalq elmi əməkdaşlıq fəaliyyətini stimullaşdırmaq və müasir elmi problemlərin həlli üçün əlavə yaradıcılıq imkanı yaratmaq məqsədilə, cari müsabiqənin razılaşdırılmış elmi prioritetlərinə uyğun olaraq, 4-cü Azərbaycan Belarus birgə beynəlxalq qrant müsabiqəsini 2024-cü ildə 16 sentyabr tarixində elan etmişdir.
Crossmedia.az xəbər verir ki, müsabiqə çərçivəsində fundamental və tətbiqi xarakterli və 200 000 manatadək maliyyə həcmli layihələrin maliyyələşdirilməsi nəzərdə tutulmuşdur. Müsabiqədə iştirak etmək üçün layihələr 2024-cü il sentyabrın 16-dan noyabrın 14-dək qəbul olunmuşdur. Müsabiqəyə layihələr Azərbaycan Elm Fondunun yaratdığı innovativ texnologiya olan “eQRANT”=“Qrant layihələrinin Elektron İdarəolunması Sistemi” vasitəsilə təqdim edilmişdir. Sənədlərin qəbulu üçün nəzərdə tutulmuş müddətdə iddiaçılara kömək və sualların cavablandırılması məqsədilə Azərbaycan Elm Fondunda məsləhət seminarları keçirilmişdir.
Fond müsabiqəyə təqdim olunmuş layihələrin elmi ekspertizası işini təşkil etmişdir. Azərbaycan Elm Fondunun icraçı direksiyası, daimi və müstəqil elmi ekspertlər təqdim olunmuş layihələrin cari müsabiqənin elmi prioritetlərinə uyğunluq dərəcəsini müəyyənləşdirmiş, layihələrin elmi səviyyəsini, onların yerinə yetirilməsi imkanlarını və potensialını, gözlənilən elmi nəticələrini, mümkün tətbiq ehtimalını ekspertiza qaydalarına uyğun olaraq xüsusi sistem üzrə qiymətləndirmiş, həmçinin maliyyələşdirilmənin məqsədəuyğunluğu və həcmi barədə rəylər, arayışlar və tövsiyələr hazırlamışdır.
Nəticələr Azərbaycan Elm Fondu və Belarus Respublika Fundamental Tədqiqatlar Fondunun Birgə Komissiyasında da müzakirə olunmuşdur. Müsabiqənin nəticələri ilə www.aef.gov.az internet səhifəsində tanış olmaq olar. Azərbaycan Elm Fondunun mətbuat xidməti.
14:19 14.03.2025
Oxunuş sayı: 691
